Россия бэрэсидьиэнэ көҕүлээбит «Култуура» национальнай бырайыагын чэрчитинэн, өрөспүүбүлүкэ 337 мөлүйүөн солкуобайтан тахса сууманы ылыаҕа. Бу туһунан СӨ култуура министиэристибэтин пресс-сулууспата иһитиннэрэр.
Үбүлээһин 2024 сылга диэри көрүлүннэ, уп федеральнай бүддьүөттэн тыырыллар. СӨ култуура уонна духуобунай сайдыы миниистирэ Юрий Куприянов этэринэн, тутууга уонна өрөмүөҥҥэ өрөспүүбүлүкэттэн эмиэ үбүлэниэҕэ.
««Култуура» национальнай бырайыак көмөтүнэн биһиги тыа сиригэр саҥа Култуура дьиэлэрин тутар уонна өрөмүөн ыытар кыахтаахпыт. Ол курдук, 2022 сылга икки Култуура саҥа дьиэтэ тутуллуоҕа уонна хапытаалынай өрөмүөн ыытыллыаҕа. Бу сыалга федеральнай бүддьүөттэн 101,2 мөлүйүөн солкуобай көрүллүөҕэ. Өрөспүүбүлүкэ элбэх мелодиһа үөскээбит — Бүлүү улууһун Тыымпы сэлиэнньэтигэр элбэх хайысхалаах култуура киинэ тутуллуоҕа. Иккис саҥа эбийиэк — 150 миэстэлээх Култуура дьиэтэ Сунтаар улууһун Кэмпэндээйи сэлиэнньэтигэр баар буолуоҕа. Эбийиэктэр иккиэн 2023 сылга үлэҕэ киирэллэрэ былааннанар», — диэтэ миниистир.
Юрий Куприянов иһитиннэрбитинэн, Саха АССР сүүс сыллаах үбүлүөйүн көрсө, 2022 сылга Горнай Бэрдьигэстээҕин, Өлүөхүмэ Заречнайын, Үөһээ Халыма Уһун Күөлүн уонна Угольнайын, Ньурба Чуукаарын Култуура дьиэлэрин хапытаалынай өрөмүөнэ ыытыллыаҕа. 2023 уонна 2024 сылларга 137,1 уонна 99 мөлүйүөн солкуобай көрүлүннэ.
Бу сыл түмүктэниитэ, Нам улууһун Аппааны сэлиэнньэтигэр саҥа Култуура дьиэтэ үлэҕэ киирэрэ былааннанар. Бүлүү Тааһаҕарыгар 2022 сылга үлэҕэ киириэхтээх Култуура дьиэтин тутуута ыытылла турар. Эбийиэккэ 74 мөлүйүөн кэриҥэ солкуобайы тыырдылар.
Маны таһынан, Федот Потапов аатынан Амматааҕы норуот айымньытын дьиэтигэр, Нерюнгри оройуонун Иенгра сэлиэнньэтин В.С. Енохова аатынан «Эян» этнокултуурунай киинигэр, Алдан уонна Зырянка оҕо искуустубатын оскуолаларыгар хапытаалынай өрөмүөн былааннанар.