Уус Алдан улууһун Найахы сэлиэнньэтигэр 2014 сыллаахха тэриллибит «Симэхтэр» иистэнньэҥнэр түмсүүлэрин оҥоһуктара араас куораттарга быыстапкаҕа турда.
Салайааччы Гоголева Харитина Ивановна. Түмсүү иһинэн хас да куруһуок үлэлиир: «Кыл сиэл алыба», «Кырадаһын кустуга», «Туос тойуга». Уопсайа 20-чэ далбар хотун иистэнэр, ол иһигэр биэс улуус маастара баар.
«Быйыл ситиһиибит элбэх. Суздаль куоракка бүтүн Россиятааҕы «Лоскутная мозаика Якутии» норуоттар икки ардыларынааҕы бэстибээлгэ кыттыыны ыллыбыт, икки иистэнньэҥ үлэтэ Францияҕа быыстапкаҕа барда. Быйыл Дьокуускайга норуоттар икки ардыларынааҕы бэстибээл чэрчитинэн, «Симэх» галереяҕа «Олоҥхо ыһыаҕын кыайыылааҕа» Федорова Мария Ивановна икки үлэтэ «Триумф мастерства» быыстапкаҕа турда», — диэтэ СӨ Үөрэҕириитин туйгуна, СӨ Учууталлар учууталлара, «Үһүс саас оскуола» салайааччыта, «Симэхтэр» түмсүү чилиэнэ Чукрова Галина Алексеевна.
Быйыл иистэнньэҥнэргэ анаан саха балаҕынын туппуттарын, нэһилиэк баһылыгын өйөбүлүн бэлиэтээтэ.
«Нэһилиэкпит баһылыга Сивцев Петр Степанович өйөбүлэ үгүс. Бүгүн маннык ситиһиигэ кэлбиппит кини сыралаах, дьаныардаах үлэтин түмүгэ буолар. Быйыл саха балаҕанын туттаран иистэнньэҥнэргэ бэлэх ууммутугар махтанабыт», — диэтэ Галина Чукрова.