Владивосток куоракка А.М. Горькай аатынан Приморскай кыраай библиотекатыгар сахалыы киинэлэр режиссердарын, искуустуба деятеллэрин уонна устудьуоннар көрсүһүүлэрэ ыытылынна. Бу туһунан өрөспүүбүлүкэ Уһук-Илиҥҥэ бэрэстэбиитэлистибэтин пресс-сулууспата иһитиннэрэр.
Бу киэһэ сүрүн ыалдьыттарынан «Сахафильм» киинэ хампаанньа уус-уран салайааччыта Алексей Романов уонна режиссера Никита Аржаков буоллулар.
Кыттааччылар саха киинэтин суолун, уратытын, саха норуотун, ону тэҥэ саха тылын харыстааһын тула сэһэргэстилэр. Библиотека дириэктэрэ Александр Брюханов режиссердар «Hollywood = Сахаllywood» холооһуҥҥа хайдах сыһыаннаһалларын ыйыталаста.
Саха өрөспүүбүлүкэтин Уһук-Илиҥҥи федеральнай уокурукка бэрэстэбиитэлэ Ким Борисов саха киинэтин аан дойду үрдүнэн уон мөлүйүөн кэриҥэ киһи көрбүтүн уонна «Саха киинэтэ» өрөспүүбүлүкэ брендэ буолбутун бэлиэтээтэ.
Саха сиригэр сыллата 8-10 саҥа киинэ сүрэхтэнэр. Бүтэһик уон сыл устата уопсайа 95 полнометражнай уус-уран киинэ тахсыбыт. Бүтэһик сылларга элбэх саха киинэтэ Россия уонна аан дойду таһымнаах наҕараадалары тутта. Чуолаан «Сахафильм» хампаанньа 50-тэн тахса бириис хаһаайынынан буолар.
Балаҕан ыйын 1-3 күннэригэр Илиҥҥи экономическэй форум култуурунай бырагырааматын чэрчитинэн Владивосток «Уссури» киинэ тыйаатырыгар Саха киинэтин күннэрэ ыытыллар.