Ыам ыйын 6 күнүттэн «Тиэргэнинэн ыллыыбыт» аахсыйа саҕаланна — НВК Саха

Ыам ыйын 6 күнүттэн бүтүн дойдутааҕы «Тиэргэнинэн ыллыыбыт» аахсыйа саҕаланна. Онно кэлэн иһэр Кыайыы күнүнэн Аҕа дойду сэриитин бэтэрээннэрин эҕэрдэлииллэр.

Дьокуускай куорат олохтоохторо, уопсастыбанньыктар уонна артыыстар Сергей Прихожаны, Петр Яковлевы, Кирилл Павловы, Валентин Ефремовы, Наум Слепцову, Мартын Григорьевы уонна Роман Николаевы эҕэрдэлээтилэр

«Кинилэр хас биирдиилэрэ сэрии суолун дьоруойдуу ааспыттара, экономика араас салаатыгар үлэлээн дойду ыһыллыытын чөлүгэр түһэрбиттэрэ. Биһиги бэтэрээннэрбит килбиэннээх быһыыларын уонна үтүөлээх үлэлэрин кинилэр наҕараадалара уонна бочуоттаах ааттара туоһулууллар. Төһө да сааһырдаллар билигин даҕаны көхтөөхтөр, өрөспүүбүлүкэҕэ убаастабыллаахтар уонна биллиилээхтэр», — диэн пресс-сулууспаҕа бэлиэтииллэр.

Аахсыйаҕа эстрада тыйаатырын артыыстара уонна «Туймаада» ансаамбыла, ону тэҥэ атын ырыаһыттар уонна оскуола үөрэнээччилэрэ кытыннылар. Кэнсиэри уопсайа Дьокуускай сэттэ аадырыстарынан көрдөрдүлэр.

Бүгүҥҥү туругунан Саха сиригэр 18 Аҕа дойду сэриитин кыттыылаахтара, 13 Ленинград блокадатын кыргыһыытын кыттыылаахтара, 12 уруккута толору сааһын ситэ илик хаайыылаах уонна 2178 тыыл бэтэрээнэ олорор. Кинилэртэн биир да киһи болҕомтото суох хаалыа суоҕа диэн этиллэр.