Саха сириттэн сылдьар ырыаһыт Леван Горозия «L’One» диэн урукку псевдонимын төннөрдө. Бу туһунан кини бэйэтин Instagram аккаунугар суруйда.
«L’One төнүннэ, ол эрээри Леван Горозия ханна да барбат. Биһиги куруутун саҕаланыыга сылдьабыт эбээт. Бардыбыт!», — диэн суруйда.
L’One диэн псевдоним 2012 сыллаахха Леван Black Star артыыһа буолбутугар үөскээбитэ. 2019 сыл кулун тутарыгар Black Star-тан барарын туһунан иһитиннэрбитэ. Суут ырыалар, клиптар уонна табаар бэлиэтин иһин быраабы лейблга хаалларбыта. Леван Горозия бу псевдонимынан сыанаҕа тахсара уонна L’One аатынан тахсыбыт ырыалары ыллыыра бобуллубута.
«Сэттэ сыл устата биһиги биир дьыаланан дьарыктаммыппыт уонна тэҥҥэ ситиһиигэ тахсыбыппыт. Биһигини сомоҕолуур уонна күүс-уох биэрэр сэттэ айымньылаах сыл. Black Star хамаандатыгар ол, историяҕа букатыннаахтык хаалар кэм, өйөбүл уонна музыка иһин махтанабын. Биһиги Павел Курьяновы [Black Star inc генеральнай дириэктэрэ — быһаарыы] уонна Вальтер Леруссены [Black Star inc лейбл музыкальнай дириэктэрэ — быһаарыы] кытта бу балаһаны бэйэ бэйэбитигэр ытыктабылы кытта түмүктүүбүт уонна бары кэлэр бырайыактарга ситиһиини эрэ баҕарабыт», — диэтэ.
Леван Горозия 1985 сыллаахха Красноярскайга төрөөбүт, ол кэнниттэн дьоно Дьокуускайга көһөн кэлбиттэр. Оҕо сылдьан Саха сирин баскетболга сүүмэрдэммит хамаандатыгар оонньуура. КВН-ҥа кыттара, Дьокуускай устудьуоннарын КВН лигатын ыытааччыта этэ. «Азия оҕолоро». норуоттар икки ардыларынааҕы оонньуулар посоллара буолар.