Дьокуускай куоракка, Нам, Уус Алдан уонна Хаҥалас улуустарыгар муус бара турар.
Нам улууһун Булуус с. муус хойуутук ааһар. Кэбээйи улууһун Сангаар бөһүөлэгинэн муус хамсаабыта, ырбыы бэлиэтэннэ. Уу таһыма кутталлаах көрдөрүүттэн намыһах.
Хаҥалас улууһун Хоточчу с. оройуонугар уу таһыма кутталлаах көрдөрүүттэн намыһах.
Муус 245 килэмиэтири тайаан устар, көмүөл суукка иһигэр 140 км уһунна.
Муус ааһарынан сибээстээн, уу таһыма үрдүүрэ уонна Нам, Мэҥэ Хаҥалас, Уус Алдан улууһун уонна куорат намыһах учаастактарын уу ылара сабаҕаланар.
Халыма өрүскэ муус Үөһээ Халыма улууһун сиринэн күүскэ ааһан эрэр. Зырянка бөһүөлэгин аннынан уу таһыма кутталлаах көрдөрүүттэн намыһах, муус орто тэтиминэн устар. Орто Халыма куорат таһынан уу таһыма кутталлаах көрдөрүүттэн намыһах.
«Биэдэмистибэлэр икки ардыларынааҕы суһал бөлөхтөр Саха сирин өрүстэригэр халаан туругар суукканы быһа мониторинг ыыталлар, улуустары кытары сибээстэһэ олороллор, халаан кэмигэр куттал суох буолуутугар быраабылалары тутуһарга нэһилиэнньэҕэ быһаарар үлэни ыыталлар. Бүгүҥҥү туругунан, Өлүөхүмэ улууһун 1 Нөөрүктээйи нэһилиэгэр уонна Нам улууһун Арбын сэлиэнньэтигэр 41 тиэргэн, ол иһигэр 27 чааһынай дьиэ ууга былдьанна. Арассыыйа Ыксаллаах быһыыга-майгыга министиэристибэтин уонна Саха сирин Быыһыыр сулууспатын быыһааччылара нэһилиэнньэни кытары Нам улууһун Граф Биэрэгин даамбатын бөҕөргөтүүгэ үлэни ыыталлар. Бүгүн Арассыыйа Ыксаллаах быһыыга-майгыга министиэристибэтин Ми-8 салгын суудуната Орто Халыма куоратыгар көтөрө былааннанар», – диэн Саха Өрөспүүбүлүкэтигэр Арассыыйа ЫБММ Сүрүн управлениетын начаалынньыга Павел Гарин иһитиннэрдэ.