Владимир Путин 2022 сылга Россияҕа хамнас алын кээмэйин уонна тиийинэн олоруу алын кээмэйин 8,6 бырыһыан улаатыннарарга этии киллэрдэ, Бу туһунан РИА Новости иһитиннэрэр.
Ол курдук МРОТ 13 890 солк., оттон тиийинэн олоруу алын кээмэйэ 12 654 солк. диэри улаатыаҕа.
«Кэлэр сылга федеральнай бүддьүөт бырайыагар билигин тиийинэн олоруу алын кээмэйин 2,5 бырыһыан индексацията уурулунна. Биллэн турар, ити ситэтэ суох, тоҕо диэтэххэ, маннык көрдөрүүлэр кэнники ыйдарга түргэтээбит инфляция таһымыттан лаппа хаалаллар», — диэн судаарыстыба салайааччыта иһитиннэрдэ.
Путин быһаарбытынан, администрациятыгар уларытыылары бэлэмнииргэ уонна кэлэр күннэргэ Госдуумаҕа киллэрэргэ соруйда. Бэрэсидьиэн депутаттарга федеральнай бүддьүөт туһунан сокуону өйүүрүгэ көрдөстө.
Ону тэҥэ араас социальнай пособиелар, ол иһигэр оҕолоох ыаллар төлөбүрдэрэ, социальнай эбии төлөбүрдэр, биэнсийэҕэ эбии төлөбүрдэр тиийинэн олоруу алын кээмэйиттэн тутулуктааҕын бэрэсидьиэн тоһоҕолоон бэлиэтээтэ.
«Бу төлөбүрдэр эмиэ улааталлар, мөлүйүөнүнэн киһи ылар», — диэн Владимир Путин эттэ.
Ону таһынан Владимир Путин биэнсийэни индексациялааһын тэтимэ дьиҥнээх инфляцияны куоһарыахтааҕын ыйда. Билигин бэрэсидьиэн администрациятыгар, РФ бырабыыталыстыбатыгар уонна Госдуумаҕа этиилэри киллэрэн туран, ити боппуруоска макроэкономическай көрдөрүүлэри учуоттаан, сотору кэминэн төннүөхтэрэ.