Өймөкөөн улууһугар Томтор нэһилиэгин Көмүс күрүө түһүлгэтигэр XVI-c Олоҥхо ыһыаҕа саҕаланна, бырааһынньыктааҕы тэрээһин от ыйын 1-2 күннэригэр буолуоҕа.
Үгэс быһыытынан, киирии ааркаҕа хас биирдии ыалдьыты арчылыыр сиэринэн-туомунан көрүстүлэр. Дьон уокка сылгы сиэлин быраҕан, Үрдүк Айыылартан үүммүт сылга этэҥҥэ буолууну, уйгу-быйаҥ дьылы көрдөһөллөр, өйдүүн-санаалыын чэбдигирэллэр. Сиэри-туому ааһаат, дьон-сэргэ Көмүс күрүө түһүлгэтигэр үөрүүлээх аһыллыыны көрө тиийдилэр.
Олоҥхо тыйаатырын артыыстара «Дугуйа Бөҕө» олоҥхонон театрализованнай туруорууну көрдөрдүлэр.
Саха сирин Ил Дархана Айсен Николаев Олоҥхо Ыһыаҕын Ытык Дуоҕатын күөрэччи көтөҕөн баран, бар дьонун ис сүрэҕиттэн истиҥник эҕэрдэлээн тыл эттэ. Ону таһынан тэрээһин үөрүүлээх аһыллыытыгар Ил Түмэн бастакы вице-спикерэ Александр Жирков, СӨ вице-премьерэ Сергей Местников, Өймөкөөн улууһун бочуоттаах гражданина, сылгыһыт Дугуйдан Винокуров уонна сахаттан бастакынан Эвереһы дабайбыт Евгений Кривошапкин кыттыыны ыллылар.
Өймөкөөҥҥө буолар Олоҥхо Ыһыаҕар култуурунай уонна спорт күрэхтэһиилэрэ ыытыллыахтара, ону тэҥэ араас быыстапкалар аһыллыахатара.