Өрөспүүбүлүкэҕэ кулун тутар 16 күнүгэр «Өксөкүлээх күнүн» олохтуур туһунан, итиэннэ 2022-2027 сыллары саха литературатын төрүттээччигэ аныырга этии киллэрдилэр. Бу туһунан Николаев-киинин пресс-сулууспата иһитиннэрэр.
Бу этиини муус устар 20 күнүгэр «А.Е. Кулаковскай — Саха сирин духуобунай лидерэ» научнай-практическай симпозиум тэрийэр кэмитиэтин мунньаҕын кыттыылаахтара киллэрдилэр. Тэрээһин ыам ыйын бүтүүтэ Алексей Кулаковскай 145 уонна «Саха интеллигенциятыгар» сурук 110 сылынан Хаҥалас улууһун Хачыкаат сэлиэнньэтигэр буолуо.
Манна кини олоро сылдьыбыта бэлиэтэнэр. Итиэннэ биллэр айымньыларын суруйбута, ол иһигэр «Саха интеллигенциятыгар суругун». Буолуохтаах симпозиум сыала — Кулаковскай интеллектуальнай-духуобунай, айымньылаах нэһилиэстибэтин оннунан хаалларыы, ааттаах-суоллаах сырдатар санаалары арыйыы уонна кэҥэтии суолларын дьүүллэһии буолуоҕа.
Маны таһынан, айымньыларын саҥа кинигэ оҥорон таһаарыахтара, нуучча, Англия уо.д.а. омук тылларыгар тылбаастыахтара. Кыттааччылар Алексей Кулаковскай 150 сылын бэлиэтииргэ тэрийэр кэмитиэти олохтуур сөптөөҕүн эттилэр.
Дьүүллэһиигэ тэрийэр кэмитиэт чилиэннэрэ кыттыыны ыллылар — норуоттар өрөспүүбүлүкэлэрин тас сибээс уонна дьыалаларын министиэристибэлэрин бэрэстэбиитэллэрэ, Николаев киин — бастакы бэрэсидьиэн Михаил Николаев архыыба, Таатта улууһа, Хаҥалас улууһун Хачыкаат сэлиэнньэтэ, наука институттара уо.д. а
Николаев-киин салайааччыта Юрий Семенов кэпсээбитинэн, симпозиум бастакы бэрэсидьиэн Михаил Николаев көҕүлээһининэн уонна өйөбүлүнэн ыытыллыа. Тэрээһин уопсастыбаннас, култуура уонна искусство деятеллэрэ, өрөспүүбүлүкэ наукатын уонна айар үлэтин интеллигенцията, дойду уонна норуоттар икки ардыларынааҕы экспертэр кыттыылаах ааһыа.