Саха сириттэн сылдьар этно-толорооччу Аэлита Ершова СМС куоластааһын түмүгүнэн «Россия» ханаал «Күөх чыычаах» оҕо талаанын куонкуруһун финалыгар таҕыста. Бу туһунан ВГТРК пресс-сулууспата иһитиннэрэр.
15 саастаах саха кыыһа биллиилээх битбоксер Вахтангы кытта дуэтынан хомуска оонньоото.
«Мин көстүүмүм үрүҥ кылтан оҥоһуллубут кыталык кыната быһыылаах. Ону тэҥэ куһаҕан тыынтан араҥаччылыыр чуораанчыктардаах», – диэн Аэлита кыттан бүтэн баран дьүүллүүр сүбэҕэ «Хомус-кыыс» көстүүмүн туһунан кэпсээтэ.
Куонкурус дьүүллүүр сүбэтигэр Сергей Безруков, Николай Цискаридзе, Дима Билан уонна Денис Мацуев киирэллэр.
Аэлита СӨ култууратын туйгуна Марина Ильинична Сокольникова-Мохначевская салайыытынан сэттэ сааһыттан хомуска уһуйуллан Саха политехническэй лиссиэй «Добун» норуодунай этнофольклорнай ансаамбылын солиһа. Кини Аан дойдутааҕы, Бүтүн Россиятааҕы, өрөспүүбүлүкэтээҕи фестиваллар уонна куонкурустар кыайыылаахтара. Ону таһынан «Айархаан» хомус академиятыгар Саха сирин үтүөлээх артыыһа, виртуоз хомусчут Альбина Михайловна Дегтяреваҕа эбии дьарыктанар.
Аэлита Ершова биир мөлүйүөн солкуобай суумалаах сүрүн бириис иһин салгыы киирсиэҕэ. Кини кытыытын «Күөх чыычаах» куонкурус ВКонтакте аккаунугар көрүөххэ сөп.