1990 сыллаахха Ржев куорат чугаһыгар көстүбүт, Аҕа дойду Улуу сэриитин саллаата Иннокентий Готовцев медальонун Уус Алдан улууһун Танда сэлиэнньэтин кыраайы үөрэтэр музейыгар тиксэрдилэр. Бу туһунан улуус дьаһалтатын пресс-сулууспата иһитиннэрэр.
Аҕа дойду дьоруойдарын күнүн бэлиэтиир үөрүүлээх тэрээһин кэмигэр Ил Дархан Айсен Николаев экспонаты музей сэбиэдиссэйигэр Матрена Черноградскаяҕа туттарда.
«29-с Армия өйдөбүнньүгэ» көрдүүр бөлөх Танда нэһилиэгиттэн төрүтттээх саллаат суруктаах футлярын 1990 сыл муус устар 7 күнүгэр аата суох саллааттар уҥуохтара көмүллүбүт сириттэн булбут.
Сурукка ыйыллыбыт дааннайдар чахчыта суох буолуохтарын сөбө бэлиэтэнэр — медальону дьэбин сиэбит.
«Иннокентий Матвеевич Готовцев 1918 сыллаахха күн сирин көрбүт, кэргэнин аата быһа холоон Мария Федоровна Готовцева», – диэн докумуоҥҥа этиллэр.
Нэһилиэк дьаһалтатын иһитиннэриитинэн, Иннокентий Готовцев 1905 сыллаахха Тандаҕа күн сирин көрбүт, «Сулус» сопхуос чилиэнэ, 1941 сыллаахха 36 саастааҕар Сэбиэскэй армия кэккэтигэр ыҥырыллыбыт. 1942 сыллаахха Смоленскай уобалас чугаһыгар сураҕа суох сүппүт.
Саллаат аймахтарын булбатахтар, онон медальон дойдутун музейыгар хараллыаҕа.