А.С. Пушкин аатынан судаарыстыбаннай
академическай нуучча тыйаатыра 130-с үбүлүөйдээх сезону балаҕан ыйын 18 күнүгэр
арыйыаҕа. Бу туһунан тыйаатыр пресс-сулууспата иһитиннэрэр.
Көрөөччүлэр испиктээкиллэргэ
билиэттэри балаҕан ыйын 1 күнүттэн атыылаһыахтарын сөп.
«Тыйаатыр салалтата бэлиэтииринэн,
эрдэ ылыллыбыт билиэттэринэн испиктээкиллэр туруоруллуохтара. Пушкин аатынан нуучча
тыйаатыра сезону үгэс быһыытынан, «Барышня-крестьянка» туруоруунан арыйыаҕа», —
диэн иһитиннэриигэ этиллэр.
Үүммүт сезоҥҥа саҥа испиктээкиллэр
көстүөхтэрэ, ол иһигэр «Путешествие Незнайки».
«Туруоруу бэлэм уонна оҕо
тэрээһинигэр хааччахтааһын уһулуннаҕына көстүөҕэ. Режиссер Андрей Борисовы кытта Улуу кыайыы 75 сылыгар аналлаах «Запасной
аэродром» диэн испиктээкили туруоруохпут. Маны таһынан, Режиссер Владимир Голуб
кэриэһигэр Островскай «Не все коту масленица» туруоруу былааннанар», — диэн тыйаатыр
художественнай салайааччыта уонна дириэктэрэ Александр Лобанов бэлиэтиир.
Балаҕан ыйын 19 уонна 26 күннэригэр «Слишком
женатый таксист» (16+), балаҕан ыйын 20 күнүгэр — «Голодранцы и аристократы» (12+),
балаҕан ыйын 24 күнүгэр — «Тетки» (14+), балаҕан ыйын 25 күнүгэр — «Out of
order или Тринадцатый номер» (14+), балаҕан ыйын 27 күнүгэр — «Очень простая
история» (12+) туруоруулар көстөллөрө былааннанар.
Испиктээкиллэр бары олохтоох
бириэмэнэн 18:00 чааска көстүөхтэрэ.
Санатар буоллахха, айар үлэ
бөлөхтөрө атырдьах ыйын 28 күнүттэн бэлэмнэниини сөргүппүттэрэ.