Дьокуускай куорат киинигэр археологическай хаһыылары оҥорор исписэлиистэр, өрөспүүбүлүкэ бырабыыталыстыбатын бэрэссэдээтэлин солбуйааччы Сергей Местниковтан хаһыы үлэлэрин болдьоҕун биир ыйга уһатар туһунан көрдөстүлэр. Бу туһунан СӨ баһылыгын уонна бырабыыталыстыбатын дьаһалтатын пресс-сулууспата иһитиннэрэр.
«Хаһыы оҥоһуллар сиригэр быһа сабаҕалаан XIX-с үйэҕэ тутуллубун мас дьиэ акылаата көһүннэ. Билигин архитектордар тутууну ойуулаан уонна үөрэттэн бүтэрдилэр, сотору көтүрүллүөҕэ. Ол кэннэ сири өссө дириҥҥэ хаһыахтара. Баҕар онно өссө былыргы, дьиҥнээх археологическай сыаннастар көстүөхтэрэ», — диэн Арктика археологиятын түмэлин научнай үлэһитэ Елена Соловьева бэлиэтээтэ.
Исписэлиистэр сабаҕалыылларынан, миэтэрэ кэриҥэ дириҥнээх култуурунай дьапталҕаны чинчийии ыытыллыаҕа. Хайыы-үйэ оҥоһуллубут аҕыйах шурф биэрбит булумньуларынан сыаналаатахха, кини балай эмэ баай.
Чинчийиилэри кичэллээхтик, историческай нэһилиэстибэтин сүтэрбэккэ ыытар туһугар, археологическэй үлэлэр болдьохторун уһатыы ирдэнэр. Наука бэрэстэбиитэллэрин этиитин Сергей Местников өйөөтө.