Любовь Борисова режиссердаах «Мин үрдүбэр күн хаһан да киирбэт» киинэни бүгүн, кулун тутар 27 күнүгэр, киэһэ 23.20 чааска «Культура» ханаалга көрдөрүөхтэрэ.
Санатан эттэххэ, «Мин үрдүбэр күн хаһан да киирбэт» киинэни Москва куоракка нууччалыы тылбаастаабыттара. Киинэҕэ Степан Петров «Гарри Поттер» киинэтигэр Сириус Блэгы саҥардыбыт Борис Токарев-Хрунов куолаһынан, оттон Иван Константинов Джесси Айзенбергы саҥардыбыт Прохор Чеховскай куолаһынан саҥарбыттара.
Артыыстары куоластарынан эрэ буолбакка, киинэ дьоруойдарын майгытын-сигилитин көрөн талбыттара.
«Киинэ нууччалыы тылбаастанан иккис тыыннанна. Араас дойду сэҥээриитин ылла уонна билигин быһа-атыыга таһаарар туһунан кэпсэтии барар», — диэбитэ «Сахафильм» хампаанньа салайааччыта Дмитрий Шадрин.