Өлөөн улууһугар АЛРОСА үбүлээһининэн «Илкит» аныгы этно-култуурунай киин тутулунна. Бу туһунан АЛРОСА пресс-сулууспата иһитиннэрдэ.
«Саҥа киин, хампаанньа эбээҥки норуотун култуурартын үйэтитэргэ үөскэтэр усулуобуйатын өссө биир хардыытынан буолар. Култуура дьиэтэ Өлөөн улууһа 85 сыллаах үбүлүөйдээх сылыгар тутуллубута олус суолталаах», — диэн хампааньа генеральнай дириэктэрин солбуйаачыта Алексей Дьячковский эттэ.
Эбийиэк 150 миэстэлээх, уопсайа 1390 кв миэтэрэ иэннээх икки мэндиэмэннээх дьиэҕэ олохтоммут. Саҥа кииҥҥэ 200 киһиэхэ аналлаах мунньахтыыр, 49 миэстэлээх киинэ көрөр, ураһа быһыылаах сиэри-туому ыытар саалалардаах. Ону тэҥэ үҥкүү, хор, тыйаатыр дьарыктанар хосторо уонна интернеттаах аһыыр сир баар. Маны таһынан Саахса уонна библиотека үлэлиэҕэ.
Киин тутуутугар АЛРОСА хампаанньа 280 мөлүйүөн солкуобайы көрдө диэн бэлиэтэнэр.
«Киин сүрүн соругунан Хоту сир омугун үгэс буолбут култууратын, тылын уонна норуот айымньытын харыстааһын буолар. Билигин биһиэхэ ансаамбыллар эрчиллиэхтэрин сөп буолла, ону таһынан илиинэн оҥоһуктар араас көрүҥнэрин сайыннарар кыахтанныбыт. Улууспутугар элбэх норуот маастардара бааллар. Кинилэр дьоҕурдарын сайыннарыах тустаахпыт», — диэтэ улуус баһылыга Александр Иванов эттэ.
Үөрүүлээх тэрээһин чэрчитинэн, этнографическэй киин аттыгар номоххо киирбит буойун удьуордаах эбэҥки уола «Үрэн Хоһуун Уола» боруонса монуменын туруордулар.