Москва куоракка «Уһук Илин күннэрэ» бэстибээл чэрчитинэн буолбут интерактивнай быыстапкаҕа өрөспүүбүлүкэ сүрүн туристическэй эбийиэктэрин көрдөрдүлэр. Бу туһунан РИА Новости кэпсээтэ.
Экспо кииҥҥэ кэлбит дьон Саха сирин истиэндэтигэр хайа хаспаҕар сытар Юки сэлии оҕотун өлүгүн көрүөхтэрэ уонна хайдах булуллубутун туһунан дэҥҥэ көстөр түбэлтэни билиэхтэрэ.
Анал тач-панельга Бүлүүс, Киһилээх хайата, «Өлүөнэ очуостара» айылҕа паарката курдук Саха сирин саамай кэрэхсэбиллээх туристическэй эбийиэктэрэ бааллар.
Маны тэҥэ тач-панельга «Тымныыны баһылааччылар», «Саха сирин оҥоһуга», «Саха сирин кыһына», «Саха сирин сайына», «Саха төрүт Ыһыаҕа» диэн Саха сирин туһунан киинэлэр уонна Тимофей Степанов «Олонхо тыыннах түбэлтэлэрэ» диэн хартыыналар бааллар.
Истиэндэҕэ туруоруллубут VR-балаһа нөҥүө ууллубат тоҥ киинигэр сылдьыахха, Өлүөнэ өрүс кэрэ көстүүлэрин уонна дьиҥнээх кыһыны дуоһуйа көрүөххэ сөп.