Үөһээ Бүлүү Күл сэлиэнньэтигэр И.Н.Барахов аатынан култуура киинэ тутуллуоҕа.
«Бырайыагынан киин 2031,74 кв.м.иэннээх, икки этээстээх дьиэ буолуохтаах, онно өрөспүүбүлүкэ судаарыстыбаннаһын түмэлэ баар буолуоҕа», — диэн СӨ тутууга уонна олорор дьиэҕэ надзорун управлениетын салайааччытын солбуйааччыта Павел Корнилов эттэ.
Маны таһынан, кииҥҥэ библиотека уонна мунньахтыыр сааланы кытары холбоһук 150 миэстэлээх киинэ тыйаатыра баар буолуоҕа. Бастакы этээскэ быыстапка саалата, түмэл матырыйаалларын уурар хос уонна дьаһалта үлэлиир хосторо баар буолуохтара. Оттон иккис этээскэ библиотека, мунньахтыыр саала, артыыс хоһо, көстүүм хоһо, куруһуок уонна айар дьарыкка аналлаах хостор үлэлиэхтэрэ.
Түмэл урукку дьиэтэ 2019 сылга саахалланар туруктааҕын иһин сабыллыбыта бэлиэтэнэр. Саҥа киин 2023 сыл ахсынньы ыйыгар тутуллан бүтэрэ былааннанар.