Саха сирин режиссера Любовь Борисова «Кэрэни көрбүт» киинэтэ тохсунньу 26 күнүттэн киэҥ көрдөрүүгэ тахсыаҕа.
«Киинэ аан дойдутааҕы премьерата Торонтоҕа TIFF — норуот икки ардыларынааҕы киинэ бэстибээлигэр буолуохтаах этэ. Ол эрээри, бэлиитикэҕэ билиҥҥи быһыыттан-майгыттан сылтаан тохтообута. Ол да буоллар, киинэ көрөөччү аудиториятыгар тиийэр, ол иһигэр норуот икки ардыларынааҕы таһымҥа – сотору кэминэн Иран уонна Индия киинэ бэстибээллэригэр көстүөҕэ. Бастатан туран, киинэ Россия киэҥ прокатыгар тахсара наада» — диэн киинэ продюсера Иван Болотников эттэ.
Маны тэҥэ, лиэнтэни Санкт-Петербурга, Москваҕа уонна Новосибирскайга тохсунньу 20 күнүттэн 23 күнүгэр диэри көрдөрүөхтэрэ. Көрдөрүүгэ режиссер Любовь Борисова кыттыаҕа.
Санатан эттэххэ, хартыына «Зимний» ааптарыскай киинэ бастакы российскай бэстибээлин сүрүн бирииһин ылбыта. Киинэ дьиҥ олоххо олоҕурбут: Саха сиригэр ойуулуур-дьүһүннүүр ускуустуба төрүттээччитэ Иван Попов уонна кини доҕорун Степан Бересеков туһунан көстөр.