«Үрүҥ хаар илгэтэ» диэн поэзия бэһис аан дойдутааҕы бэстибээлэ Хотугулуу-Илиҥҥи федеральнай үнүбэрситиэт «Сэргэлээх уоттара» култуура киинигэр саҕаланна. Бу туһунан ХИФУ пресс-сулууспата иһитиннэрдэ.
«Бэстибээл көмөтүнэн биһиги саха литературатын сэҥээрэр эрэллээх доҕоттордоннубут. Бу тэрээһин чэрчитинэн элбэх ыалдьыт кэлэн барда, кинилэр саха литературатын пропагандалалыыллар, ону тэҥэ араас тылга тылбаастаан, киэҥ эйгэҕэ таһаарбыттара», – диэн саха народнай поэта Наталья Харлампьева бэлиэтээтэ.
Быйылгы поэтическай бэстибээл саха народнай поэта Сэмэн Данилов 100 сылыгар анаммыт. Тэрээһин кыттыылаахтара поэт төрөөбүт-үөскээбит сиригэр Горнай улууһун Дьиикимдэ нэһилиэгэр баран, саҥа култуура дьиэтин арыйыы сиэригэр-туомугар кыттыахтара.
Ил Дархан Айсен Николаев аан дойдутааҕы «Үрүҥ хаар илгэтэ» бэстибээл кыттыылаахтарын кытары алтынньы ый 15 күнүгэр көрсүбүтэ.