Уус Алдан Баатаҕай нэһилиэгин олохтоохторун Сиипсэптэр-Белолюбскайдар дьиэ кэргэн тиэргэнэ ааспыт «Саҥа Дьыл» алыптаах кэмнэрин саната, чаҕылхай уоттарынан сандаара күлүмнээн, араас хаар оҥоһуктарынан киэркэйэн турар. Хаһаайка Екатерина Белолюбская саха сирин биллэр спортсмена, мас тардыһыыга спорт маастара, пауэрлифтиҥҥа спорт маастарыгар хандьыдаат. Дьиэлэрин таһын киэргэтэр үгэстэммиттэрэ уон сыл буолбут.
«Хаар оҥоһуктарбытын оҥорорго саамай улахан үлэ хаар мунньуута, пириэстээһин буолар. Кыраһа — саҥа түспүт сыа хаар ордук бассар, үчүгэйдик кыһыллар, форматын тутар. Онтон быһыытын таһааран баран, кырааскалыыр эмиэ бэйэтэ туспа кистэлэҥнэрдээх. Уон сыл тухары араас ньымалары боруобалаан, бэйэбэр бассары буллум диэххэ сөп. Оҥоһуктарбытын куруук көрө-харайа сылдьабыт. Хаар түстэҕинэ олбуорбут иһин күрдьүөх иннинэ бастаан оҥоһуктарбытын ыраастыыбыт. Ааммыт холуодатыгар анаан кинилэри тэбиир сиэл дэйбиир ыйанан турар. Бу оҥорбут оҥоһуктарбыт саҥа эрэ дьылга буолбакка, хаар ууллуор диэри харахпытын уөрдэллэр. Киһи санаата өрө көтөҕүүлээх сылдьара бэйэбититтэн эрэ тутулуктаах диэн санааттан айабыт – тутабыт. Онон эһиги эмиэ кытаатын, тулаҕыт тупсаҕай буоларыгар кыһаллын. Киһи сатыырын – киһи сатыахтаах», — диэн тарбаҕар талааннаах Екатерина Белолюбская санаатын үллэстэр.