Ньурба гимназиятыгар үөрэнэр сэттис кылаас оҕото Тимур Софронов үүнээйи эттиктэриттэн пластик оҥорбут.
Оҥоһугун өрөспүүбүлүкэтээҕи «Инникигэ хардыы» научнай конференцияҕа билиһиннэрбит. Растительнай полисахаридтан оҥоһуллубут пластик икки нэдиэлэ иһинэн суураллар.
«Биһиги пластигы хортуоппуй уонна кукуруза крахмалыттан оҥорбуппут. Онно глицерин, 9%-наах уксус аһыыбатын, ыраастаммыт ууну уонна крахмаллары булкуйан оҥорбуппут»,- диэн эдэр учуонай кэпсээтэ.
Тимур бу бырайыакка бастакы сылын үлэлээбит. Инникитин рецептуратын өссө кэҥэтэн, биопластигын тупсарар санаалаах.