Олоххо буолбут түбэлтэни көрдөрөр киинэни тохсунньу 30 күнүгэр Лена киинэ тыйаатырыгар сүрэхтээтилэр.
👩🏼⚕️1937 сыллаахха Ленинградтан сылдьар 19 саастаах Капитолина Облезова төрөппүттэрэ репрессийэҕэ түбэһэннэр ийэтэ кыыһын ыраах Саха сиригэр күрэтэр. Быраас кыыс Өлөөн улууһун Дьилиндэ нэһилиэгэр үлэлии тиийэр. Туох да өйөбүлэ, ким да көмөтө, чугас дьоно суох табаһыттары сыстыганнаах ыарыыттан өрүһүйэр.
📝1970 сыллар саҕаланыыларыгар эргэ балыыһа дьиэтин көтүрэ сылдьан Капитолина ийэтигэр суруйбут суруктарын булаллар. Ити сюжетынан драматург Баһылай Харысхал пьеса суруйбута. Онтон 2017 сыллаахха Мииринэйдээҕи театр испиктээкил туруорбута.
🎬Киинэни үс аҥаар сыл устата уһуллулар. Бастаан Өлөөн улууһугар сүрэхтээбиттэрэ. Маны таһынан хартыына Благовещенскайга уонна Анаадырьга икки бэстибээлгэ кыттан анал бириистэргэ тиксэн турар. Өрөспүүбүлүкэ улахан экраннарыгар киинэ олунньу 2-с күнүттэн көстүөҕэ.