«Эдэр артыыс» тыйаатыра Бэрдьигэстээхтээҕи норуот тыйаатырын уонна орто оскуолатын уопсай бырайыага буолан үлэлээбитэ сэттис сыла. Бу сыллар тухары «Сказка о царе Салтане», «Волшебная лампа Алладина», «Ночь перед Рождеством», «Золушка» остуоруйалары туруорбуттар. Салайааччынан А. Осипов аатынан Бэрдьигэстээх орто оскуолатын нуучча тылын уонна литературатын учуутала Мартынова Евдокия Кирилловна таһаарыылаахтык үлэлиир. Тыйаатыр өрөспүүбүлүкэ таһымнаах араас конкурс лаурета, кыайыылаҕа.
Быйыл элбэх киһи сэргээн ааҕар Льюис Кэрролл айымньытынан «Алиса в стране чудес» остуоруйаны туруордулар. Бу испиктээккэ оскуола тыйаатырын үрдүкү кылааһын үөрэнээччилэрэ, барыта 23 оҕо кыттыыны ылла. Туруорууга анаан дьэрэкээн көстүүлээх 36 көстүүм тигилиннэ, элбэх реквизит, декорация оҥоһулунна. Ону таһынан электроннай анимационнай декорацияны олус кичэллэн бэлэмнээбиттэр.
Элбэх киһи биһирэбилин ылбыт остуоруйа туруорааччы режиссерунан ССРС культуратын туйгуна, Саха өрөспүүбүлүкэтин культуратын үтүөлээх үлэһитэ Мартынова Елизавета Иевна буолар.