Айсен Николаев Табаһыттар норуоттар икки ардыларынааҕы бастакы чемпионаттарынан кыттааччылары уонна ыалдьыттары эҕэрдэлээтэ.
«Саха сиригэр аан дойду табаһыттара түмсүбүттэринэн киэн туттабыт. Манна норуот төрүт үгэһин үйэтитэр, харыстыыр дьон мустубут. Чемпионат табаһыт үлэтин таһымын, сатабылын үрдэтэргэ олук буолуо», — диэтэ кини.
«Оленеводы Мира» Ассоциация Сэбиэтин бэрэсидьиэнэ Сергей Харючи бэлиэтээбитинэн, Саха сирэ табаны иитии өйөбүлүгэр холобур көрдөрөр. Итиэннэ чемпионат сүрүн ситиһиитинэн доҕордоһуу, түмсүү буоларын бэлиэтээтэ.
Санатан эттэххэ, Норуоттар икки ардыларынааҕы үгэс буолбут табаны иитии чемпионатыгар Россия 13 региона уонна түөрт тас дойду — Монголия, Кытай, Гренландия уонна Исландия кыттар.