М.А. Алексеев аатынан «Туймаада» норуот икки ардыларынааҕы үөрэнээччилэр олимпиадаларыгар уонна Yakutia International Science Fair конференция-күрэскэ аан бастакытын Ыһыах тэрийбиттэр.
200-тэн тахса үөрэнээччи, эксперт, СӨ уонна атын регионнар, дойдулар педагогтара Эркээни хочоҕо саха төрүт бырааһынньыгын көрдүлэр. Кыттааччылары алҕаатылар, кымыһынан уонна алаадьынан күндүлээтилэр.
Култуурунай бырагыраамаҕа саха үҥкүүтүн, ырыатын, хомуһун иһитиннэрдилэр, көрдөрдүлэр. Ону тэҥэ оһуохайдаатылар.
Үөрэнээччилэр төрүт оонньууларга, күрэстэргэ көхтөөхтүк кытыннылар уонна норуот уус-уран айымньытын быыстапкатын көрдүлэр. Кыайыылаахтарга уонна кыттааччыларга мэтээллэри уонна грамоталары туттардылар.
«Биһиги олус сөбүлээтибит, элбэх үөрүүлээх түгэннэр буоллулар. Эһиги региоҥҥут туһунан элбэҕи биллибит, манна кэлиэхпит иннинэ улаханнык билбэт этибит. Эһиги үгэскитин тутуһар эбиккит», — диэн Ставропольскай кыраайтан кэлбит кыттааччылар санааларын эттилэр.
«Мин Саха сиригэр бастакыбын кэллим. Ордук дьону түмэр оһуохайтан сөхтүм. Мин физика олимпиадатыгар кыттабын», — диэн Екатеринбургтан кэлбит Анастасия Буженова эттэ.
Ыһыах чэрчитинэн олимпиада хамсааһынын сайдыытыгар сүҥкэн кылааты киллэрсибит көхтөөх экспертэргэ, дьүүллүүр сүбэҕэ уонна хамыыһыйаҕа махтал суруктары туттардылар.
Санатан эттэххэ, ХХХ норуот икки ардыларынааҕы «Туймаада» олимпиадаҕа 200-тэн тахса үөрэнээччи очно уонна кэтэхтэн кыттар. Олортон 77-тэ дойду дегионнарыттан, 77-тэ атын судаарыстыбалартан уонна 47 Саха сирин үөрэнээччилэрэ.
Yakutia International Science Fair конференция-күрэскэ уон дойдуттан 106 үөрэнээччи, Россияттан 6 регион уонна Саха сириттэн үс улуус уонна Дьокуускайтан үөрэнээччилэр кытталлар.