Үөрэх стратигическай суолталаах салаа. Үөрэх сайдыытыттан олох хаачыстыбата, ону тэҥэ биллэн турар Саха сирин инникитэ тутулуктаах. 2023-2024 үөрэх дьылыгар 16 тыһ. тахса оҕо оскуола боруогун аан бастакытын атыллаабыта. 7 тыһ. кэриҥэ киһи орто, 6,5 тыһ. тахса ыччат үрдүк үөрэх устудьуона аатын сүктүлэр. Күн бүгүн өрөспүүбүлүкэҕэ 634 оскуола, 756 уһуйаан, 42 орто үөрэх уонна алта үрдүк үөрэх үлэлиир. Онно 153 тыһ. тахса оскуола оҕото, 68 тыһ. тахса уһуйаан иитиллээччитэ, 24 тыһ. тахса орто, эмиэ итиччэ үрдүк үөрэх устудьуона үөрэнэ сылдьар.
СӨ Ил Дархана Айсен Николаев үөрэх үлэһиттэрин атырдьах ыйынааҕы сүрүн мунньаҕар тыл этэригэр үөрэх тэрилтэлэрин каадырынан хааччыйыы суолталааҕын ыйан туран, эдэр педагогтар хамнастарын 75% акылаатын диэри үрдэтэргэ соруйбута. Онон оҕо үөрэнэригэр, үүнэригэр-сайдарыгар сыллата усулуобуйаны тупсаран иһэллэр. Уонтан итэҕэһэ суох оскуола тутуллан олоххо киирэр. Педагог уонна уһуйааччы сыла төһө сэргэхтик уонна таһаарыылаахтык иһэрий? 2023 сылга үөрэҕи бүтэрбит дьон үлэнэн хааччыллыыларын кэтээн көрүү үлэтэ хайдаҕый? Ону тэҥэ оскуолалары учууталларынан хааччыйыыга үлэ хайдах быһыылаахтык ыытылларый?