Бэҕэһээ, сэтинньи 14 күнүгэр, култуура, искусство үлэһиттэригэр Анемподист Иванович Софронов-Алампа аатынан бириэмийэни туттардылар.
Сэтинньи 14 күнүгэр Саха литературатын төрүттээччилэртэн биирдэстэрэ, бэйиэт, прозаик, драматург, публицист, эрэдээктэр, уопсастыбанньык Анемподист Иванович Софронов-Алампа төрөөбүтэ 137 сыла бэлиэтэннэ.
«Быйыл тоҕус анал аакка кыайыылаахтары быһаардыбыт. Ити анал ааттар Анемподист Софронов ханнык хайысхаларга инники күөҥҥэ сылдьыбытын көрдөрөр, кини өрүү барытыгар бастыҥ уонна инники сылдьыбыта. Сыллата биһиги суруйааччы олоҕуттан тоҕус саҥа чахчыны буламмыт саха дьонугар иһитиннэрэбит. Бүгүҥҥү күҥҥэ уопсайа 45 чахчы баар», — диэн Олоҥхо тыйаатырын салайааччыта Мария Турантаева эттэ.
Быйылгы бириэмийэ кыайыылаахтара:
«Литература тыла» – литературовед, филологическай наука доктора, ХИФУ профессора Варвара Окорокова;
«Кылаан дьүрүскэн айааччы» – Николай Михеев;
«Өрөгөйдөөх өйөөччү» – «Арктик Капитал» хампаанньа тэрийээччитэ Матвей Евсеев;
«Дэгиттэр режиссер» – Саха академическай тыйаатырын режиссера Сергей Потапов;
«Чаҕылхай артыыс» – Саха академическай тыйаатырын артыыһа Иннокентий Луковцев;
«Чаҕылхай артыыска» – Олоҥхо тыйаатырын артыыһа Нюргуяна Маркова;
«Ырыа айааччы» – Иван Туласынов;
«Дархан ойууһут» — Александр Манжурьев;
«Киинэ эйгэтин чыпчаал үлэһитэ» – Иннокентий Сивцев;
«Алампаҕа сүдү бэриниилээх» – Ем. Ярославскай аатынан түмэл Чөркөөхтөөҕү филиалын сэбиэдиссэйин эбээһинэһин толорооччу Михаил Протодьяконов.
Бу бириэмийэ, Саха сирин бары айар сойуустарын, түмсүүлэрин — суруйааччылары, худуоһунньуктары, киинэ, тыйаатыр үлэһиттэрин, муусука айааччылары сомоҕолуур, холбуур бириэмийэ буолар.