«Поет Россия Армии Победу» бырайыак чэрчитинэн анал байыаннай дьайыы кыттаачыларын өйөөн Россия Аармыйатын Киин дьиэтигэр Өрөспүүбүлүкэ скрипачтарын ансаамбыла «Виртуозы Якутии» кэнсиэр көрдөрдө.
Баахтан, Брамстан, Пьяцоллаттан саҕалаан Аҕа Дойду сэриитин кэминээҕи уонна төрүт матыыптаах композициялары артыыстар толордулар.
«СВО-ну өйөөн бу хаһыс да кэнсиэрбит. Ити иннинэ Москватааҕы норуоттар икки ардыларынааҕы ырыа дьиэтигэр улахан патриотическай кэнсиэр арыйбыппыт, Подмосковье байыаннай балыыһаларыгар айаннаабыппыт. Саха сиригэр куруутун кэнсиэрдиибит уонна бэйэбит аармыйабытыгар көмөлөһөбүт. Саха сирин элбэх эр дьоно анал байыаннай дьайыы балаһатыгар кыттыыны ылаллар. Олор быыстарыгар Александр Колесов Россия Дьоруойун аатын бастакынан сүктэ. Кини 50 киһини быыһаан турардаах. Россия Аармыйатын Киин дьиэтигэр ыыппыт кэнсиэрбитин төрөөбүт дойдуларын иннигэр ытык иэстэрин толорор байыастарга аныыбыт», — диэн «Виртуозы Якутии» ансаамбыл дириэктэрэ Станислав Афанасенко кэпсээтэ.
«Виртуозы Якутии» ансаамбыл 1994 сылга олохтоммута. Кэллэктиип Италия Кремона куоратыгар буолбут норуоттар икки ардыларынааҕы ырыа бэстибээлигэр Гран-при ылбыта. Санкт-Петербург 300-с үбүлүөйдээх сылын туолуутугар Россия регионнарыттан соҕотох ырыа кэллэктиибэ буолан кыттыыны ылбыта. Шаляпин аатынан опернай бэстибээлгэ кэнсиэрдээбитэ.