2023 сылга киэҥ эйгэҕэ тахсыбыт саха киинэлэрэ бары холбоон 100 мөл. солк. киллэрдилэр.
Ааспыт сылга барыта холбоон уон киинэ көрдөрүүгэ тахсан, 100 мөл. солк. киллэрбиттэр. Онно 300 тыһ. киһи сылдьыбыт.
«Саха» НКИХ сериалларын сулууспата устубут «Харчы. Иэстэбил» киинэтэ аҕыс мөл. тахса солк. киллэрэн лиидэрдэр ортолоругар сылдьар.
Саха сирин киинэлэрэ өрөспүүбүлүкэ таһыгар 10%-н үбү-харчыны киллэрбиттэр.
Режиссер Любовь Борисова «Кэрэни көрбүт» киинэтин Lenta.ru 2023 сыл бастыҥ киинэлэрин ахсааныгар киллэрбитэ, ону тэҥэ хартыынаны «Золотой орел» бириэмийэ «Лучший игровой фильм» анал аатын лонг-лииһигэр түһэрбиттэрэ. Киинэ «Тюркскай» түүр омуктар култуураларын норуоттар икки ардыларынааҕы тэрилтэлэрин, Бишкектааҕы норуоттар икки ардыларынааҕы киинэ бэстибээлин анал бирииһин ылбыта, «Северный характер» XV норуоттар икки ардыларынааҕы киинэ бэстибээлигэр гран-при үрдүк аатын ситиспитэ, Лондоҥҥа SIFFA UK — 2023 бэстибээлгэ «Лучший полнометражный сценарий» категорияҕа «Лучшая игровая повесть», Александр Чичахов — «Бастыҥ актер», оператор Семен Аманатов — «Лучшая кинематография».
Режиссер Эдуард Новиков «Макушка земли» тэттик киинэтэ VII-c Arcticopen норуоттар икки ардыларынааҕы киинэ бэстибээлин «За лучшее раскрытие Арктических образов» анал бирииһин ылбыта.
Саха сирин бырабыыталыстыбата олохтоох киинэни өйүүр бырайыага салҕанар. Питчинг түмүгүнэн сэттэ бырайыак биһирэммитэ, кыайбыт киинэ устааччылар уопсайа 20 мөлүйүөн солкуобай көмө харчыны үллэстибиттэрэ.
Балаҕан ыйын 15-20 күннэригэр Казахстан Алматы куоратыгар «Русские сезоны» бырайыак чэрчитинэн Саха сирин киинэтин күннэрэ ыытылыннылар. Алматы олохтоохторугар анаан уон сахалыы киинэни көрдөрбүттэрэ.
Ахсынньы 1-4 күннэригэр Дьокуускайга тас дойдулартан уонна олохтоох экспердэр кыттыылаах III-с «Республика Кино» тэттик киинэ өрөспүүбүлүкэтээҕи бэстибээлэ буолла.
Дьокуускайга элбэх хайысханы толорор киинэ павильона Уһук Илиҥҥэ соҕотох киининэн буолуо уонна киинэ хайысхатыгар үлэлэһээччилэргэ усулуобуйаны тэрийиэ.
Киинэ павильонун 2027 сылга диэри тутуллара былааннанар. Куорат маастар-былааныгар олоҕуран, тутуу учаастага – киин куорат 68-с кыбаарталын территорията.
Санатар буоллахха, Россия бэрэсидьиэнэ Владимир Путин соруйуутунан Дьокуускайга элбэх хайысхалаах киинэ павильона тутуллар.