Москваҕа «Россия» быыстапкаҕа РФ цифровой сайдыыга, сибээскэ уонна массовай коммуникацияҕа миниистирэ Максут Шадаев Саха сирин павильонын көрдө.
Киниэхэ «Сайберия» хампаанньа түөскэ тахсар рак искэнин булар диагностическай модулун саҥа бырайыак быһыытынан билиһиннэрдилэр. Ону тэҥэ «Смарт Юнит» хампаанньа «Хорус» авиационнай двигателлары кэтиир-маныыр систиэмэтин көрдөрдүлэр. Бу барыта «Саха сирэ» технопарк резиденнэрин оҥоһуктарын регион аатыттан көрдөрүнньүккэ таһаардылар.
Бырайыактар «Алроса» уонна Саха сирэ инновациятын сайдыытын пуондатын биир үлэтин чэрчитинэн оҥоһуллубуттара. Максут Шадаев өрөспүүбүлүкэ бырагырааматын үрдүктүк сыаналаата. Кинилэр тас дойду тиэхиньикэтин солбуйар гына толкуйдаммыттар.
«Якутия» авиа хампаанньа «Хорус» систиэмэни Канада систиэмэтин оннугар билигин туттар. Миниистир бу систиэмэни тыраанспар министиэристибэтэ эмиэ көрүөн, билсиэн наада диэн бэлиэтээтэ.