Ааспыт сайын Хаҥалас улууһун Дьар нэһилиэгэр археологическай экспедиция үлэлээтэ. Манна Истээх Мырааҥҥа Тыгын Дархан сиэнэ Маһары хараллан сытара биллэр. Бөдьөкө уола Маһары сахалартан бастакынан ыраахтааҕыга тиийэ сылдьыбыт киһи быһыытынан биһиги билинэбит. Кини сахалартан бастакы дипломант уонна кинээс. Ол иһин учуонайдар, кыраайы үөрэтээччилэр киниэхэ интэриэстэрэ улахан.
Ааспыт үйэ 30-с сылларыгар биллиилээх учуонай Гаврил Ксенофонтов манна хаһыылары оҥорбута. Ол туһунан отчуот национальнай архыыпка хараллан сытар. Оттон бу аныгы хаһыы тугу бигэргэттэй?