СӨ Ил Дархана Айсен Николаев ааспыт бээтинсэҕэ, ахсынньы 22 күнүгэр, 6-с төгүлүн Ил Түмэҥҥэ анал этиитин тиэртэ. Айсен Сергеевич киирии тылыгар СВО кыттыылаахтарыгар уонна дьоруойдуу өлбүт буойуттарбытыгар, анал байыаннай дьайыы хонуутугар олоҕун толук уурбут Россия Дьоруойа Дмитрий Егоров сырдык кэриэһигэр кутурҕан мүнүүтэтин биллэрдэ. Туһаайан этиигэ ааспыт биэс сыл устата ситиһиллибити, анал байыаннай дьайыыга өйөбүл дьаһаллар тустарынан уонна кэлэр биэс сыллааҕы социальнай экономическай сайдыыга Саха сирин иннигэр турар сүрүн соруктарга туһуламмыт стратегическай хайысхалааҕы сырдатта уонна үүнэр сылга норуот хаһаайыстыбатын хас биирдии салаатын иннигэр турар тус сыалы-соругу туруорда. Онон бу анал этиигэ олоҕуран инники үлэ былаана чопчуланна.
Дойду бэрэсидьиэнэ Владимир Путин дьиэ кэргэн эйгэтигэр судаарыстыбаннай бэлиитикэни киэҥник тарҕатар уонна дьиэ кэргэн төрүт үгэстэрин харыстыыр соруктаах кэлэр 2024 сылы Россияҕа дьиэ кэргэн сылынан биллэрэрин туһунан ыйаахха илии баттаабыта. Оттон Ил Дархан Айсен Николаев анал этиитигэр кэлэр сылы Саха сиригэр Оҕо саас сылынан биллэрбитэ. Оҕону патриотическай тыыҥҥа иитии, өйүн-санаатын, дьоҕурун сайыннарыы, этин-сиинин эрчийии билиҥҥи кэмҥэ олус суолталаах. Маныаха биһиги уопсастыбабыт дьиэ кэргэн сыаннастарын харыстыырга бэйэтин кылаатын киллэриэҕэ диэн эрэл улахан.