Биллэрин курдук, киһи доруобуйата астан улахан тутулуктаах. Роспотребнадзор соторутааҕыта иһитиннэрбитинэн, дойдуга өлүү 63 бырыһыана ас мөлтөх хаачыстыбалааҕыттан, сыыһа аһааһынтан тахсар.
Саха сиригэр саамай уустук кыһалҕа – хайдах хаачыстыбалааҕа биллибэт кэлии бородууксуйаны кытта күрэстэһэр кыах суох. Онон хаачыстыбалаах аһы оҥорон бэйэ бородууксуйатын дэлэтии соруга турар. Тыа сирин стратегическай сайдыытыгар кэпэрээссийэ хайаан да инники күөҥҥэ сылдьыахтаах диэн этэллэр. Кэпэрээссийэлэһии сүрүн соруга тыа дьонун эбии дохуоттааһын эрэ буолбатах. Олохтоох аһы элбэтии соругун быһаарыахтаах.
Тыа хаһаайыстыбатын потребительскай кэпэрэтииптэригэр анаан, “Саха Өрөспүүбүлүкэтигэр 2020 – 2024 сылларга тыа хаһаайыстыбатын сайыннарыы итиэннэ тыа хаһаайыстыбатын бородууксуйатын, сырьетун уонна аһын-үөлүн ырыынактарын сүрүннээһин” судаарыстыбаннай бырагырааманы олоххо киллэрии сүнньүнэн, 2020 сылтан саҕалаан өйөбүл саҥа төһүүтэ олохтоммута. Ол – тыа хаһаайыстыбатын потребительскай кэпэрэтииптэрэ хотон, сайылык уонна оҕуруот аһын, хортуоппуйу уурар-харайар эбийиэги тутталларыгар, саҥалыы оҥостоллоругар көрсөр ороскуоттарын сорҕотун толуйууга үбүнэн көмө.
Кэпэрээссийэ – күүһү түмэн үлэ — диэн этиигэ бүгүҥҥү биэриини туһаайыахпыт. Сахабыт сиригэр кэпэрээссийэ төһө сааһыланан эрэрий? Кэпэрээссийэ үлэтин хайдах гынан сэниэлээхтик хамнатыахха сөбүй? Итиннэ уонна атын ыйытыыларга сыһыаннаах этиилэри, элбэх санааны истиэхпит, кэпсэттибит.