Муус устар иккис аҥаарыттан Казахстаҥҥа Саха сирин күннэрэр буолуохтара. Өрөспүүбүлүкэ атыы-эргиэн, экономика, инвестиция, туризм хайысхаларыгар бэйэтин кыаҕын көрдөрүөҕэ уонна култуурунай бырагырааматын туруоруоҕа. Тэрээһиннэр Астанааҕа, Петропавловскайга, Алматыыга муус устар 18-23 күннэригэр ыытыллыахтара.
Санатарбыт курдук, Ил Дархан Айсен Николаев Казахстан бэрэсидьиэнин Касым-Жомартом Токаевтыын 2023 сыл тохсунньутугар Астанааҕа көрсүбүтэ. Көрсүһүү кэмигэр өрөспүүбүлүкэлэр икки ардыларыгар ыытыллыахтаах үлэ сыалын-соругун, хайысхатын дьүүллэспиттэрэ, ону тэҥэ Казахстаҥҥа Саха сирин күннэрин тэрийэри былааннаабыттара.
Астана куоракка «Виртуозы Якутии» судаарыстыбаннай ансаамбыл кэнсиэрин туруоруохтара.
Казахстан Национальнай түмэлигэр «Сокровища Якутии» норуодунай прикладной искуустуба уонна култуура быыстапкатын тэрийиэхтэрэ. Манна түөрт салаанан сылгы култууратыгар сыһыаннаах экспонаттар, скулптуура уонна тимир уустар оҥоһуктара көрүнньүккэ тахсыахтара. Быыстапка муус устар 18 күнүттэн ыам ыйа 1 күнүгэр диэри буолуоҕа.
Ону тэҥэ «Ньургун Боотур» операны «Астана Балет» тыйаатырга режиссер Андрей Борисов туруоруоҕа. Бу кэнниттэн Алматыыга Абай аатынан Казахскай национальнай опера уонна балет тыйаатырыгар көрдөрүөхтэрэ.
«Астана Балет» тыйаатырга «Вечер современной хореографии» ыытыллыаҕа. Бырагыраамаҕа «Геометрия движения» уонна «Сияющий камень» биир аакталаах балеттары киллэрбиттэр. Испиктээктэри Д.К. Сивцев–Суорун Омоллоон аатынан судаарыстыбаннай опера уонна балет тыйаатырын гастролун чэрчитинэн Казахстаҥҥа уонна Кыргызстаҥҥа көрдөрүөхтэрэ. Бу барыта Россия култууратын министиэристибэтин бүтүн Россиятааҕы гастрольнай-кэнсиэр былаанынан ыытыллар.
Ону тэҥэ Саха сирин күннэрин чэрчитинэн Астанааҕа, Петропавловскайга, Алматыыга сахалыы киинэлэри көрдөрүөхтэрэ, Олоҥхо тыйаатырын «Кыыс Дэбилийэ» испиктээгин К. Куанышбаев аатынан Казахскай муусука уонна драма тыйаатырыгар уонна М.Ю. Лермонтов аатынан национальнай академическай нуучча драма тыйаатырыгар туруоруохтара
Астанааҕа СӨ норуодунай поэтын Наталья Харлампьева «Якутская стрела» диэн кинигэтин сүрэхтэниитэ буолуоҕа. Норуоттар икки ардыларынааҕы төгүрүк остуолга төрүт тыл литэрэтиирэтин сайдыытыгар аналлаах боппуруостары ырытыахтара.
Алматыыга фольклорга уонна эпоска аналлаах тэрээһиннэр туспа бырагырааманан ыытыллыахтара. Ыхлас аатынан норуодунай муусука үнүстүрүмүөннэрин түмэлигэр «Чарующие звуки предков» быыстапканы оҥоруохтара. Манна Саха сириттэн, Казахстантан, Кыргызстантан норуодунай эпоһу толорооччулар кыттыахтара. Быыстапкаҕа лиэксийэлэр ыытыллыахтара, ону тэҥэ сахалыы муусука үнүстүрүмүөннэрин уонна саха маастардарын туһунан түмэл киинэтин көрдөрүөхтэрэ. Хас биирдии баҕалаах бэйэтэ интерактивнай үнүстүрүмүөннэргэ оонньуон көрүөн сөп. Быыстапкаҕа Руслан Габышев кырыымпаҕа оонньуоҕа.
Саха сирин күннэрин чэрчитинэн Казахстан Хоту уобалаһын акиматын уонна СӨ бырабыыталыстыбатын икки ардыларынааҕы меморандума олоххо киирэригэр аналлаах тэрээһиннэр былааннара баттанара көрүллэр. Ону тэҥэ Дьокуускай Петропавловскайы кытта доҕордуу дуогабарын баттыаҕа.