РФ бэрэсидьиэнэ Владимир Путин норуоттар икки ардыларынааҕы «Россия» быыстапка-пуорумҥа «Родные — Любимые» пуорум чэрчитинэн Дьиэ кэргэн сыла саҕаламмытын биллэрдэ.
«Ыарахаттары барытын кыайыахха-хотуохха сөп. Биһиги дойдубут биир түмсүүлээх, сомоҕолоох. Онон биһиги ханнык баҕар сыалы-соругу бииргэ ситиһиэхпит. Элбэх оҕолоох дьиэ кэргэн түмсүүлээх буоллаҕына, бэйэ бэйэлэригэр көмөлөстөхтөрүнэ, оҕолоро да үтүө киһи быһыытынан улааталлар», — диэтэ бэрэсидьиэн.
Киин сценаҕа дьиэ кэргэн сыаннастарыгар сыһыаннаах кэнсиэр буолла, «Россия Сүрэҕин» бүтүн Россиятааҕы дьиэ кэргэн аал уотун уматыы сиэрин-туомун ыыттылар. Манна дойду бары федеральнай уокуруктарыттан уонна саҥа регионнартан ыаллар кытыннылар.
Дьиэ кэргэн аал уотун Муромтан, Свято-Троицкай сыаркаптан Терентьевтар дьиэ кэргэн аҕалла. Михаил уонна Екатерина Терентьевтар бииргэ ыал буолан олорбуттара номнуо 25 сыл, кинилэр алта оҕолоохтор.
Терентьевтар уоту Крымтан сылдьар Кузнецовтар дьиэ кэргэҥҥэ туттарда. Павел уонна Татьяна Кузнецовтар Рубиновай сыбаайбаларын бэлиэтээбиттэрэ. Кинилэр бииргэ номнуо 40 сыл олордулар.
«Россия Сүрэҕин» уматан бараннар, уоту 12 лампаадаҕа көһөрдүлэр. Бу 12 уоту федеральнай уокуруктар уонна саҥа регионнар киин куораттарыгар айаннатыахтара. Саха сирин, Кемеровскай уобалас Кузбаһын, Ямало-Ненецкий уокурук, Татарстантан, Хотугу Осетия Аланиятыттан, Волгоград уобалаһыттан, Комиттан «Россия» быыстапкаҕа холбоспут дьиэ кэргэттэр лампадалары илдьиэхтэрэ.
Донбасска лампадалары ДНР уонна ЛНР элбэх оҕолоох ыаллара, ону тэҥэ Херсонскай уонна Запорожскай уобалас дьиэ кэргэттэрэ тиэрдиэхтэрэ. Өссө биир уоту «Россия» быыстапкаҕа анаан уматтылар.