Муус устар 6 күнүгэр «Россия» норуоттар икки ардыларынааҕы быыстапка-пуорумҥа Ярославль куораттан Константин Панфилов кэргэнинээн Екатеринаны кытты ыалдьыттаата. Кинилэр ВДНХ быыстапкатыгар үбүлүөйдээх ыалдьыт аатын сүктүлэр.
«Бу биһиэхэ олус соһуччу түгэн. Быыстапкаҕа аан бастаан кэллибит, олус диэн үөрдүбүт», — диэтэ Константин Панфилов.
«Бу кэмҥэ кэлбиппит хата бэрт эбит», — диэн кэргэнэ Екатерина эттэ.
Константин кэргэнинээн «Росатомтан» уонна «Россия» ситиһиилэрин быыстапкатын дириэксийэтиттэн» Мурманскайга айан сертификатын сүүйдүлэр. Кинилэр «Ленин» атомнай ледоколга уонна Кольскайдааҕы атомнай уот ыстаансыйатыгар сылдьар кыахтаннылар.
Ону тэҥэ үбүлүөйдээх аатын сүкпүт ыалдьыкка анаан Териберк сэлиэнньэтигэр экскурсия оҥоруохтара. Бу Мурманскайга айаннара уонна олорор сирдэрэ босхо, тэрийээччилэр төлүүллэр.
«Айан бэрт интэриэһинэй буолуоҕа. Быйыл ахсынньы 3 күнүгэр «Ленин» ледоколга судаарыстыбаннай былааҕы өрө көтөхпүттэрэ 65 сыла бэлиэтэнэр. Бу аан дойдуга бастакы атомнай ледокол буолар. Кинилэргэ ледокол штабын уонна салайар систиэмэтин көрдөрүөхтэрэ. Бу айаны өргө диэри саныы сылдьыахтара диэн эрэнэбин», — диэн «ГлавСевморпуть» генеральнай дириэктэрэ Сергей Зыбко бэлиэтээтэ.
«Россия» быыстапка-пуорум дойду ситиһиилэрин биир былаһааккаҕа түмтэ. Пуорум дойду бэрэсидьиэнэ Владимир Путин сорудаҕынан ыытыллар. Быыстапка 2024 сыл от ыйын 8 күнүгэр диэри буолуоҕа.