«Олох устар сүүрүгэ
Талбытынан уһаарар,
Тыыгын тыаҕа таһаарар,
Арыт үөскэ киллэрэр.
Чугаһаспыт тыы тэйсэр,
Ыраах-ыраах — тиксиһэр.
Билэр киһиҥ ыраатар,
Билбэт киһиҥ чугаһыыр…
…Уус-уран айымньыга саха иэйиитэ, саха өйө, саха тыла бииргэ буоллахтарына, сахалыы куттаах киһиэхэ сахалыы иэйии кэйиэх, тыган киириэх тустаах! Үтүө-күндү ааҕааччым, иҥиҥ кэйдин, иэйииҥ кэйдин! Дом!»
Бу кэйэн киирэр иэйии туһунан сонун тылынан этэр эбит, ааҕааччыга хоһоон уран дьөрбөтүн утары уунар эбит «саха тылын эмчитэ» диэн махталлаах аатынан сүрэхтэммит ытык-мааны киһибит — Дапсы. Ийэ тыл күнүн көрсө Сайа Дапсылыын тылбыт туругун туһунан эрэ буолбакка, хоһоон тыллыытын, олох уонна дьылҕа аналын туһунан кэпсэтиитин көрүҥ.