Арктикатааҕы судаарыстыбаннай култуура института уонна Уһук Илиҥҥи федеральнай университет «Приоритет-2030» диэн стратегияҕа лиидэр бырагырааматын чэрчитинэн киинэни оҥорууга үөрэх бырагырааматын ыытыахтара. Бу туһунан АГИКИ ректора Саргылана Игнатьева иһитиннэрдэ.
«Саха сирэ киинэни сайыннарарга улахан уопуттаах. Барытын уопсастыба уонна Ил Дархан Айсен Николаев өйөбүлүнэн ситистибит. Биһиги институппут «Приоритет-2030» бырагыраама чэрчитинэн ыытар үлэтэ Арктика уонна Уһук Илин регионнарыгар киинэ индустриятыгар исписэлиистэри бэлэмниир сыалтан оҥоһуллар. Ол курдук, былырыын «Руководство студией кино-, фото- и видеотворчества» диэн бырагыраама үлэтин саҕалаабыта. Билигин биһиги саҥа бырагырааманы Уһук Илиҥҥи федеральнай университеты кытта таһаарарбытын былаанныыбыт», — диэн кини эттэ.
Үөрэх бырагыраамата «Приоритет-2030» бырагыраама «Новое якутское кино» трегын чэрчитинэн тахсыаҕа. Бу күннэргэ институтка сааскы киинэ оскуолатын лабораторията буола турар. Бу сырыыга киинэ оскуолатын кыттыылаахтара сценарнай лаборатория үлэтин үөрэтиэхтэрэ, драматургияны чинчийиэхтэрэ. Үс нэдиэлэ устата сценарийдары суруйуохтара, ыҥырыылаах экспердэр лиэксийэлэрин истиэхтэрэ, ону тэҥэ институт «Киинэ» хайысхатын устудьуоннара лиэксийэлэргэ эмиэ сылдьыахтара. Ректор этэрин курдук, кэлиҥҥи кэмҥэ АГИКИ киинэтин оскуолаларыгар Уһук Илин уонна Арктика регионнарын талааннаах эдэр ыччата үөрэнэрэ былааннанар.
«Новое якутское кино» трек киинэ индустриятыгар саҥа исписэлиистэри бэлэмнииргэ анаан оҥоһуллар.
«Саха сирин киинэтин сайдыытын «Якутское кино: от культурного феномена — к креативной индустрии-драйверу» коммуникационнай бырайыак «Серебряный лучник» коммуникацияҕа Россия бириэмийэтигэр кыайыылаах буолбута туоһулуур. Ил Дархан Айсен Николаев бэлиэтиирин курдук, өрөспүүбүлүкэ киинэ индустриятыгар үрдүк ситиһиилэннэ. Ааспыт сылга дойду үрдүнэн хас биирдии бэһис киинэҕэ наҕарааданы Саха сирин кинематографтара ылбыттара», — диэтэ Саргылана Игнатьева.