Виссарион Томскай диэн кинематография бэтэрээнэ, олоҕун анаабыт үлэтин туһунан олус умсулҕаннаахтык, долгутуулаахтык кэпсиир киһи. Оннук өрө көтөҕүллэн кэпсэтэн бүппүппүт кэннэ арай миэхэ хоһоон кинигэтин бэлэхтээн соһутта. «Оттон эрдэ этиэххин, биир эмит хоһооҥҥун аахтарыам этэ буоллаҕа» — диибин. «Ээ, көннөрү суруйабын» — диир. Билигин элбэх дьон хоһоон суруйар. Ол суруйуулар ортолоругар киһи үтүөкэн хоһооннору көрсө түһээччи. Виссарион Томскай «Санаам сырдык аһыллыыта» диэн кинигэтигэр эмиэ оннук хоһооннорго түбэһэн ытыспын таһынан ыллым.
Чолбон сулус курдук
Чоҕулуччу көрөн турбутуҥ
Хара моонньоҕон курдук
Хараххынан эн миигин.
Күөл уута тыалга охсуллан
Күүгэннэнэ оонньуурунуу
Аарыма тыал охсуллан
Акыйаан уутун аймыырыныы
Уйан-чараас сүрэхпин
Уһугуннарда эн көрүүҥ.
Түөһүм иһигэр сүрэҕим
Көҥүл-босхо мөҥүттэ
Хааным миэнэ оонньоото,
Сааскы халаан уутунуу
Тоҕо көтөн тахсаары
Тулуппакка ыксатта.
Чолбон сулус курдук
Чоҕулуччу көрөн турбутуҥ
Хара моонньоҕон курдук
Харааччы көрбүт хараххынан.
Хайдах маннык буолуоҕай,
Хайдах эрэ тохтотуохха…
Сөрүүн тыалга үрдэрэн,
Сүрэхпин оннугар түһэрэн
Сүнньүн булларбыт киһи
Сөп буолсу быһыылаах.
Виссарион ТОМСКАЙ
Мин бүгүн кынаттаах курдукпун:
Ыһыахха, улахан күрэххэ
Эбэтэр күүрээннээх үлэҕэ
Мин кыайан тахсыбыт курдукпун.
Мин бүгүн кынаттаах курдукпун:
Охсуулаах суоллары ааһаммын,
Оннооҕор кыһыны туорааммын
Чээл күөххэ үктэммит курдукпун.
Мин бүгүн кынаттаах курдукпун:
Аан бастаан дууһаны долгутар,
Санааны, сүрэҕи сымнатар
Ырыаны мин айбыт курдукпун.
Мин бүгүн кынаттаах курдукпун:
Үйэбэр, унньуктаах олохпор
Ылыммыт күн чыпчаал сорукпун
Бу бүгүн ситиспит курдукпун.
Санаалыын, сүрэхтиин бүүс-бүттүүн
Сайаҕас, сып-сырдык, чэпчэки…
«Туохтаный?» диэн санаан көрбүтүм,
Миигин «сээн!», — диэбит эбиккит.
Оҕус сиэппит, оонньооботох оҕо саастаах Виссарион Томскай олоҕун дьылҕата биэрэн үөрэммит идэтигэр — киинэ сайдыытыгар анаан кэллэ. Кини иэйиилээх кэпсээниттэн киинэ көрдөрүүтүн «көмүс» кэмин, ыһыллыы кэмигэр тэрилтэ тыыннаах хаалбыта туохтанын, саҥа кэрдиис кэмҥэ ханнык саҥа соруктар туралларын сэргээҥҥит истиҥ, ытык киһи чэбдик толкуйуттан, үтүө санаатыттан истиҥник үөрүҥ. Сайа.