Саха сиригэр орто үөрэх сайдыбыта быданнаата. Өрөспүүбүлүкэ сайдыытыгар суолталаах Орто анал үөрэхтэри регион экономикатын хамсатар күүс быһыытынан уонна аҕыйах сылтан бэттэх үөрэх бу салаатын исписэлиистэр түргэнник ороскуотун толуйар диэн сыаналаатылар. Устудьуоннар чиҥ билиилээх, практиканы толору барбыт идэлэрин толору баһылаабыт исписэлиис буолан үөрэх кыһатын бүтэрэллэр.
Онтон үлэ ырыынага, ол иһигэр бөдөҥ промышленнай хампаанньалар саҥа ирдэбиллэри туруораллар.
Орто анал үөрэх таһыма, ирдэбилэ уларыйда. Билигин урукку курдук аҥаардас сатабылга эрэ үөрэппэттэр. Устудьуоннары толкуйдуурга, айарга-тутарга эмиэ уһуйаллар. Үөрэх программатыгар элбэх уларыйыы киирдэ. Аны оҥорон таһаарыыга туттуллар тэрил уларыйда. Технология биир сиргэ турбат, олох хаамыытыгар сөп түбэһэн, саҥа тэрил производствоҕа туттуллар буолара кэлэн иһэр. Автоматизация, роботизация, информатизация, цифровизация хайысхалара күүскэ сайдан эрэллэр. Олорго сөптөөх үөрэҕи тэрийэр сорук турар.
Күн бүгүн Саха сирин үрдүнэн 42 орто анал үөрэх кыһата баар, онно 25 000 устудьуон үөрэнэр. Ол иһигэр киин куоракка 12 орто анал үөрэх тэрилтэтэ үлэлиир.
Бу үөрэх кыһаларыттан сыл аайы алта тыһыынча эдэр исписэлиис иитиллэн тахсар. Ааспыт сыл түмүгүнэн, орто анал үөрэҕи бүтэрэн үлэҕэ киирбит ыччат ахсаана 42 % тэҥнэспит. Балартан улахан аҥаардара бырамыысыланнас эйгэтигэр үлэ булбуттар.
Орто анал үөрэх кыһатын бүтэрбиттэри үлэнэн хааччыйыы туһунан «Талбан» биэриигэ кэпсэттибит.