«MUUS uSTAR» ыччат бэстибээлин чэрчитинэн тэриллибит тэттик кээмэйдээх киинэ сценарийын куонкуруһугар үлэлэри тутуу бүгүн түмүктэннэ. Бу туһунан «Сахафильм» киинэ хампаанньа салайааччыта, тэттик киинэ сценарийын куонкуруһун тэрийээччитэ Сардана Саввина иһитиннэрдэ.
«Тэттик кээмэйдээх киинэ сценарийын куонкуруһугар уопсайа 50-тан тахса үлэ киирдэ. Манна 18-тан 35-гэр диэри саастаах өрөспүүбүлүкэ ыччата кытынна. Кыттааччылар киинэ режиссера, сценарист Андрей Кравчук маастар-кылааһыгар сылдьыахтара. Хамыыһыйа үс бастыҥ үлэни талыа, кыайыылааҕы «MUUS uSTAR» бэстибээл кэмигэр биллэриэхпит», — диэтэ кини.
Куонкурус кыайыылаахтара хампаанньаттан харчынан бириистэри, техническэй өйөбүлү ылыахтара диэн бэлиэтээтэ, ону тэҥэ 2022 сыл ахсынньытыгар «Киинэ Өрөспүүбүлүкэтэ» кылгас кээмэйдээх киинэ бэстибээлигэр кыттыахтара.