Арктика күнүн бэлиэтиир туһунан ыйаах 2014 сыллаахха тахсыбыта, онтон ыла сыллата кулун тутар 19 күнүгэр бэлиэтэнэр. Бу туһунан СӨ бырабыыталыстыбатын уонна баһылыгын дьаһалтатын пресс-сулууспата иһитиннэрэр.
Бырааһынньыгынан Ил Дархан Айсен Николаев эҕэрдэлээтэ. Кини бэлиэтээбитинэн, өрөспүүбүлүкэ 13 улууһа Россия Арктическай балаһатыгар сытар уонна регион 40%-на Арктика сиригэр-уотугар киирэр.
«Биһиги сыалбыт — тыйыс уонна кэрэ сиргэ саҥа тыыны киллэрии, кини олохтоохторугар саҥа саҕахтары арыйыы, үүнэр көлүөнэни иитиигэ уонна үлэҕэ-хамнаска Арктиканы тупсаҕай оҥоруу. Маннык соругу дойду бэрэсидьиэнэ Владимир Владимирович Путин туруорда», — диэтэ Ил Дархан.
Айсен Николаев эбэн эппитинэн, Арктиканы сайыннарыы былааныгар киирэр: аэропортары саҥардыы, аччыгый авиацияны сайыннарыы, Хотугу муоранан суудуна сырыытын сөргүтүү, суолу-ииһи оҥоруу, нэһилиэнньэлээх пууннары интэрниэтинэн хааччыйыы, социальнай эбйиэктэри тутуу, үөрэҕи, медицинаны сайыннарыы, хотугу норуоттар үгэстэрин, култуураларын уонна олохторун оҥкулун харыстааһын.
«Арктика улуустарын бары дьонугар-сэргэтигэр Хоту дойдуга иһирэх тапталгыт, өрөспүүбүлүкэ сайдарын туһугар үлэҕит-хамнаскыт иһин махтанабын. Бүттүүн күүспүтүнэн бигэ туруктаах Арктика олохтонорун ситиһиэхпит диэн эрэнэбин! Ис сүрэхпиттэн кытаанах доруобуйаны, үтүө олоҕу-дьаһаҕы уонна сайдыыны баҕарабын!» — диэтэ өрөспүүбүлүкэ баһылыга.