Олунньу 1 күнүгэр Дмитрий Давыдов уонна Степан Бураншев режиссердаах «Ыт» киинэ KION онлайн киинэ тыйаатырга тахсыаҕа.
Сэттэ кылгас кэпсээҥҥэ ханнык баҕарар кыра дэриэбинэҕэ буолуон сөптөөх түбэлтэлэр көстөллөр. Аҕатын саатын бэлисипиэккэ атастаспыт мэник уол, арыгылаан баран харчытын сүтэрбит эр киһи, туалет тутуутуттан кыһырсыбыт ыаллыылар, быыбартан сылтаан кэпсэппэт буолбут эрдээх ойох, ыппыт кустарын былдьаһан охсуспут булчуттар уонна да атын олоххо буолар сурахтартан уһуллубут киинэ.
Киинэни Аммаҕа уһулбуттара. Барыта холбоон 70 артыыс кыттыбыта. Ол курдук, оруолларга Амма олохтоохторо, Саха тыйаатырын артыыстара оонньообуттара.
Киинэ сүрэхтэниитэ Варшаватааҕы норуоттар икки ардыларынааҕы киинэ бэстибээлигэр буолбута. Саха сирин киинэтэ «За чистый кинематографический взгляд на простую повседневную жизнь» диэн дьүүллүүр сүбэ анал бирииһин уонна NETPAC түмсүү дипломун ылары ситиспитэ.