Бүгүн, сэтинньи 26 күнүгэр, онус үбүлүөйдээх сылын ыытыллар «Кыһын Саха сириттэн саҕаланар» бэстибээл саҕаланна. Бу туһунан СӨ бырабыыталыстыбатын уонна баһылыгын дьаһалтатын пресс-сулууспата иһитиннэрэр.
Кэнники икки сыл иһигэр бэстибээл сорох тэрээһинэ онлайн көрүҥүнэн ыытыллар.
««Кыһын Саха сириттэн саҕаланар» бэстибээл көмөтүнэн Саха сирин тымныыта бренд буолла. Саха төрүт култууратын, олоҕун-дьаһаҕын элбэх турист интэриэһиргиир. Онон билигин биһиги сорукпут — өрөспүүбүлүкэҕэ элбэх турист кэлэрин ситиһии, усулуобуйа оҥоруу. Биһиги сыалбыт — коронавирус ыарыыта тэнийиэн иннинээҕи кэмҥэ төннүү уонна бэстибээли олоҕурбут ньыманан тэрийии», — диэтэ Ил Дархан Айсен Николаев.
Бэстибээл аан бастаан өрөспүүбүлүкэҕэ 2011 сыллаахха, Айсен Николаев көҕүлээһининэн ыытыллыбыта, оччолорго кини куорат мээрэ этэ. Билиҥҥи туругунан тэрээһин норуоттар икки ардыларынааҕы статустаах. Аан дойду араас дьоно Саха сирин култууратын, аһын-үөлүн уонна төрүт үгэһин билсэр кыахтаах.
Ордук «Саха сирин амтана» («Вкус Якутии») ас бэстибээлэ биллэр, манна ыалдьыттар аныгылыы киэргэтиллибит национальнай бүлүүдэни амсайаллар. Итиэннэ тоҥ балык бырааһынньыга уонна хаартан, муустан оҥоһуктар куонкурустара ыытыллар.
Бэстибээл бырагырааматыгар «Хотугу норуоттар оонньуулара» хотугу многоборьеҕа күрэхтэһии буолар. Айар бөлөхтөр «Бриллиантовые Нотки» ырыа, үҥкүү куонкуруһугар бэлэмнэнэллэр.
Маны таһынан, «Arctic fashion show» муода көрдөрүүтүн куонкуруһа быйыл үһүс төгүлүн ыытыллыаҕа, саҥа саҕалыыр дизайнердарга сайдалларыгар төһүү күүс буолуоҕа.
Ахсынньы 1 күнүгэр Саха сиригэр сүрүн харыйа уота сандаарыаҕа. Тэрээһин иккис сылын онлайн буолар.