Ил Дархан Айсен Николаев көҕүлээбит «Смотри, это Россия!» куонкуруһун чэрчитинэн, уон аҕыс тыһыынчаттан тахса үөрэнээччи бэйэтин регионун туһунан видеону уһулла. Бу туһунан СӨ бырабыыталыстыбатын уонна баһылыгын дьаһалтатын пресс-сулууспата иһитиннэрэр.
««Смотри, это Россия!» куонкуруска видеороликтары хомуйуу түмүктэннэ. Манна уруккутунааҕар элбэх үлэ киирдэ, 85 регион үөрэнээччилэрэ бэйэлэрин үлэлэрин ыыттылар. Уопсайа 3600-тэн тахса хамаанда бэлиэтэннэ, ол эбэтэр 18 тыһыынча кыттааччы», — диэн иһитиннэриигэ этиллэр.
Видеону 11-15 саастаах оҕолор устан ыыппыттар. Дойдуларын туһунан номоҕу ордук Саха сирин, Москва, Санкт-Петербург, Краснодарскай кыраай уонна Тульскай уобалас кыттааччылара кэпсээбиттэр.
Оҕолор соруктара — дойдуларын туһунан кэпсээн ыытыы. Ордук дойдуларыгар биллэр-көстөр дьон, ытык сирдэр, географическай уонна историческай эбийиэктэр тустарынан сырдаппыттар. Сонун, мультипликационнай ролик, театральнай туруоруу, документальнай киинэ быһыытынан матырыйаалы тиэрдии интэриэһи тардыбыт.
«Былырыын Саха сирин үөрэнээччилэрин көҕүлээһинин дойду араас регионнара өйөөбүттэрэ. Быйылгы «Смотри, это Россия!» куонкурус ону өссө төгүл бигэргэттэ, бэйэлэрин дойдуларын историятын үөрэ-көтө үллэстэр кыттааччы ахсаана эбилиннэ. Маннык тэрээһин дойдубут далааһынын өйдүүргэ уонна Россия патриоттарын иитэн таһаарарга төһүү күүс буолар», — диэтэ өрөспүүбүлүкэ баһылыга Айсен Николаев.
Сэтинньи 25 күнүгэр сайт нөҥүө куоластааһын саҕаланыаҕа. Ахсынньы 9 күнүгэр диэри сааһынан үс бөлөххө арааран кыайыылаахтары көрөөччүлэр быһаарыахтара — баҕалаах киһи бэйэтин санаатын этэр бырааптаах.
Бастыҥ үлэ ааптардара смартфонунан наҕараадаланыахтара. Куонкурус партнердара «Креатив в изучении своей малой родины», «Юные амбассадоры своего региона», «Знание», «Дети России», «Лучший сценарий» уонна «Лучшая операторская работа» анал аат хаһаайыттарын быһаарыахтара, бэйэлэрин бириистэрин туттарыахтара.