Бүгүн, сэтинньи 12 күнүгэр, өрөспүүбүлүкэ киин куоратыгар Россия үтүөлээх экономиһа, «Хотугу сулус» уордьан бастакы кавалера Владимир Павлов аатынан сквер үөрүүлээх аһыллыыта буолла. Бу туһунан СӨ бырабыыталыстыбатын уонна баһылыгын дьаһалтатын пресс-сулууспата иһитиннэрэр.
Кини олорбут дьиэтин таһыгар, Чернышевскай аатынан уулуссаҕа биллиилээх судаарыстыбаннай үлэһит саҥа уопсастыбаннай эйгэтэ баар буолла.
Өрөспүүбүлүкэ салалтатын аатыттан бырабыыталыстыба уонна баһылык дьаһалтатын салайааччыта Афанасий Владимиров тыл эттэ.
«Владимир Гаврилович үлэтэ Ийэ дойдуга, норуокка тапталынан салаллара. Бу сквер — кини үрдүк аатыгар сүгүрүйэрбит бэлиэтэ. Үүнэр көлүөнэ кинини холобур оҥостуох тустаах. Саха сирин дьонун-сэргэтин кини оҥорбут үлэтин салгыыргытыгар уонна кини курдук бэриниилээхтик үлэлииргитигэр ыҥырабын», — диэтэ кини.
Владимир Павловы кэриэстээн уопсастыбанньыктар уонна Сунтаар улууһуттан биир дойдулаахтара кэллилэр. Ол иһигэр өрөспүүбүлүкэ вице-премьерэ Михаил Никифоров, норуот дьокутаата Матвей Евсеев, улуус баһылыга Анатолий Григорьев бааллар.
Владимир Павлов КПСС оройуоннааҕы кэмитиэтигэр үлэлиир сылларыгар тыа хаһаайыстыбатын бары салаатыгар оҥорон таһаарыы үрдүк көрдөрүүүлэммитин Сунтаар улууһун баһылыга бэлиэтээтэ. Ону тэҥэ, өрөспүүбүлүкэ социальнай-экономическай сайдыытыгар оруолун ахтан-санаан ааста.
Биллиилээх судаарыстыбаннай деятель кыыһа Валерия Слепцова дьиэ кэргэнин аатыттан сквери оҥорууга кыттыыны ылбыт дьоҥҥо махталын биллэрдэ. Тэрээһиҥҥэ Алгыс сиэрин-туомун оҥордулар уонна Владимир Павлов пааматынньыгар тыыннаах сибэккини уурдулар.