Алтынньы 28 күнүгэр, «Большие гастроли» федеральнай бырагыраама чэрчитинэн, П.А. Ойуунускай аатынан Саха академическай тыйаатырыгар Санкт-Петербург куораттан Александринскай тыйаатыр делегацията кэллэ. Бу туһунан тыйаатыр дириэктэрин солбуйааччыта Михаил Егоров иһитиннэрэр.
«2022 сылга федеральнай бырагыраама чэрчитинэн Дьокуускайга Россия
былыргы тыйаатырдарыттан биирдэстэрэ — Александринскай тыйаатыр гастроллара
буолара былааннанар. Онон тыйаатыр сыанатын үөрэтиэхтэрэ, уотун-күөһүн,
тыаһын-ууһун билсиэхтэрэ», — диэтэ дириэктэри солбуйааччы.
Бүгүн Александринскай тыйаатыр художественнай салайааччыта Валерий Фокин делегацияҕа кыттыһыаҕа. Делегация саха төрүт култууратын уонна тыйаатырын кытта билсиэҕэ. Луиджи Пиранделло «Шесть персонажей в поисках автора» испиктээкилин көрүү былааннанар.