Балаҕан ыйын 16-19 күннэригэр Алтаай өрөспүүбүлүкэтин Хайалаах Алтаай куоратыгар Аан дойдутааҕы «Эпическэй нэһилиэстибэ уонна эпоһы толорооһун искусствота» диэн ассамблеяҕа Мэҥэ Хаҥалас улууһуттан Олоҥхо дьиэтин үлэһиттэрэ кыттан кэллилэр.
Бу туһунан Олоҥхо дьиэтин салайааччыта Евдокия Иванова иһитиннэрдэ.
«Ассамблеяҕа түүр тыллаах омуктары тэҥэ Сибиир уобаластарыттан кыттыыны ыллылар. Тэрийээһини Россия култууратын министиэристибэтэ, Россиятааҕы В.Д. Поленов аатынан уус-уран норуот айымньытын дьиэтэ, Алтай өрөспүүбүлүкэтин култуураҕа министиэристибэтэ, Алтай өрөспүүбүлүкэтин уус-уран норуот айымньытын дьиэтэ үрдүк таһымҥа ыыттылар», — диэтэ Олоҥхо дьиэтин салайааччыта.
Ассамблея сыала –
эпическэй нэһилиэстибэни харыстааһын, үйэтитии, тарҕатыы, регионнар, норуоттар
икки ардыларыгар төрүт култуура сайдыытыгар биир ситими олохтооһун, норуоттар
доҕордуу сыаһыаннарын бөҕөргөтүү буолар. Тэрээһиҥҥэ Казахстантан, Кыргыстантан,
Убекистантан, Монголияттан, Россия регионнарыттан Бурятияттан, Хакасияттан,
Калмыкияттан, Тываттан, Саха сириттэн, Мордовияттан, Башкирияттан, Сибиир
уобаластарыттан Кузбастан, Новосибирскай, Ленинградскай, Владимирскай, Томскай,
Вологодскай уобаластартан кыттыыны ыллылар.
«Ассамблея иһинэн араас тэрээһиннэр киэҥ бырагырааманан ыытылыннылар. Бу күннэргэ араас омуктар бэйэбит култуурабытын, ырыабытын-тойукпутун, олоҥхобутун билистибит, киэҥ кэпсэтиилэргэ кытынныбыт, алтыстыбыт», — диэтэ Евдокия Иванова.
Национальнай библиотека конференц-саалыгар «Эпическэй нэһилиэстибэни уонна Евразия норуоттарын ырыаларын, эпостарын үйэтитии, харыстааһын, сайыннарыы» диэн төгүрүк остуол ыытылынна. Бу төгүрүк остуолга тас дойдулартан, Россия регионнарын профессордара, филологическай наука доктордара, учуонайдара кыттыыны ыллылар. Саха сириттэн Евдокия Николаева Иванова, Захар Николаевич Никитин кытыннылар.
«Улууспут култууратын управлениетын салайааччытыгар Дмитрий Аргуновка, профсоюз бэрэссэдээтэлигэр улахан тэрээһиҥҥэ кыттарбытын өйөөбүттэригэр, өрөспүүбүлүкэтээҕи норуот уус-уран аймньытын дьиэтин дириэктэригэр, бу ыытыллар тэрээһиҥҥэ Мэҥэ-Хаҥалас улууһун Олоҥхо дьиэтин кыттыыны ылын диэн сүбэлээн ыыппыккытыгар, өйөөбүккүтүгэр махтанабыт!», — диэтэ Олоҥхо дьиэтин салайааччыта Евдокия Иванова.