«ТЭФИ-Мультимедиа» суруналыыстыка эйгэтигэр үрдүкү ситиһиилэрин иһин национальнай бириэмийэ финалиһа Андрей Алексеев «Смотри, это Россия!» куонкурус кыттыылаахтарыгар анаан устууга уонна монтаж үлэтигэр маастар-кылаас ыытта. Бу туһунан СӨ бырабыыталыстыбатын уонна баһылыгын дьаһалтатын пресс-сулууспата иһитиннэрэр.
Кини хайдах каадыры таба таҥарга, экспозицияны таларга, уонна төлөпүөн видеокамераттан итэҕэһэ суоҕун быһаарда. «Смотри, это Россия!» курдук куонкурус сайдарга төһүү күүс буоларын бэлиэтээтэ, үөрэнээччилэри көхтөөхтүк кытталларыгар ыҥырда.
«Бу хамсааһыҥҥа кыттыһа сатааҥ, бэйэҕит кыраайгытын үөрэтин, араас өттүттэн көрдөрүҥ. Ситиһии сэрэппэккэ кэлиэн сөп. Биһиги быйыл ТЭФИ-гэ кыттыбыппыт, бу сыалбыт буолбатах этэ. Түмүктүүр түһүмэххэ тахсан баран, Владимир Путинтан интервью ылбыт хамаандаттан хотторбуппут. Дьэ, бу, кырдьык, таһым буолар уонна инникигэ кынаттыыр. Билигин боруобалыахха наада, туох баарынан устуохха — боростуой төлөпүөҥҥэ да буоллун — уонна иннигит диэки хардыылааҥ!», — диэтэ Андрей Алексеев.
«Смотри, это Россия!» бырайыакка Россия оскуолаларын үөрэнээччилэрэ хамаанда тэринэн кытталлар уонна сайыннарар ис хоһоонноох видео иһитиннэрии (видеооткрытка) ыыталлар: бэйэлэрин дойдуларын туһунан кэпсииллэр уонна атын дойду оҕолоругар эҕэрдэ ыыталлар. Оҕолор үлэлэрин чэпчэтэн тэрийээччилэр таба устууга маастар-кылаастары ыыталлар.
Билигин куонкурус иккис сезона буола турар. Бастакы түһүмэх 2020 сыллаахха Ил Дархан Айсен Николаев өйөбүлүнэн ыытыллыбыта. Манна араас регион үөрэнээччилэрэ кыттыыны ылбыттара, бэйэлэрин дойдуларын туһунан сырдаппыттара, ролик устубуттара уонна эҕэрдэ ыытыспыттара.
Хамаанданы сэтинньи 1 күнүгэр диэри испииһэккэ киллэттэриэххэ сөп. Сиһилии сайтка билсиҥ.