Уһук Илиҥҥи регион «Университетская книга» куонкуруһугар Хотугулуу Илиҥҥи үнүбэрсиэт кинигэтин кыһата үс анал аакка биэс кыайыыны ситистэ уонна диплом ылла. Ону тэҥэ, Владивосток куоракка «Печатный двор» быыстапка-дьаарбаҥкаҕа боруонса мэтээл хаһаайына буолла. Бу туһунан үрдүк үөрэх кыһатын пресс-сулууспата иһитиннэрэр.
«Быыстапка-дьаарбаҥка чэрчитинэн, «Трансформация научно-издательской деятельности» туһалаах научнай-практическай семинар тэрилиннэ. Кинигэ дьыалатыгар биир халыып, саҥа бородуукталар, өҥө боппуруостарын дьүүллэстилэр. Маны таһынан, биһиги үлэһиттэрбит дьыалабыай, дьүүллэһии былаһааккаларыгар кытыннылар», – диэтэ кинигэ кыһатын дириэктэрэ Валентина Слепцова.
Ол курдук «Лучшее справочное издание» анал аакка «Административное устройство, гражданское, военное, горное и церковное управление Ленского (Якутского) края» диэн Павел Казарян ыйынньыга кыайда.
Кинигэҕэ ураты историческай тиэкистэр уонна таһаарыыларга ссылкалар бааллара бэлиэтэнэр. Хотугулуу Илиҥҥи федеральнай үнүбэрсиэккэ ыйынньык кулун тутар 5 күнүгэр сүрэхтэммит.
Наҕараадалар истэригэр — икки анал аакка кыайыы иһин грамоталар уонна диплом. «Бастыҥ историко-библиографическай, кыраайы үөрэтэр таһаарыыларынан» «Гетерофония творчества Эдуарда Алексеева» уонна «Архаика: украшения якутов XIV-XVIII вв» ааттаннылар.
«Гуманитарнай наукаларга бастыҥ таһаарыы» анал ааты «Особенности функционирования эргативных и альтернативных конструкций в чукотском языке» монография ылла.
Маны таһынан, Уһук Илиҥҥи регион «Печатный двор» быыстапкатын дьүүллүүр сүбэтэ ХИФУ хас да үлэтин үрдүктүк сыаналаата: «Новая экономика: региональные аспекты и перспективы» монографиятын, «Административное устройство, гражданское, военное, горное и церковное управление Ленского (Якутского) края» ыйынньыгы уонна «Ради будущего» Саха судаарстыбаннай үнүбэрсиэтин-ХИФУ тыыл бэтэрээннэрин уонна сэрии оҕолорун олохторун уонна үлэлэрин очерката.